ރިސޯޓުތަކުގެ މިސްކިތްތަކަށް، 109 ޚަޠީބުން ތަމްރީނުކޮށްފި
ރިސޯޓުތަކުގެ މިސްކިތްތަކަށް ޚާއްޞަކޮށް 109 ޚަޠީބުން ތަމްރީނުކުރުމަށް ހިންގި ޕްރޮގްރާމް ނިންމައިލައިފިއެވެ.
މި ތަމްރީނު ޕްރޮގްރާމްގައި ސަނަދު ޙާސިލު ކުރެއްވި ބޭފުޅުންނާ ވާހަކަފުޅުދައްކަވަމުން މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވިދާޅުވީ، މިިިިިިި ޕްރޮގްރާމަކީ، މިނިސްޓަރ އޮފް ޓުއަރިޒަމް ޑރ.ޢަބްދުﷲ މައުސޫމްގެ އެދިވަޑައިގަތުމުގެ މަތިން ފަރުމާކުރެއްވި ޕްރޮގްރާމެއް ކަމަށެވެ. އަދި ޑރ.ޢަބްދުﷲ މައުސޫމް މިކަމަށް ދެއްވި އިސްކަން ފާހަގަކުރައްވައި އޭނާއަށް ޑރ.އަޙްމަދު ޒާހިރު ޢަލީ ވަނީ ޝުކުރު އަދާކުރައްވައިފައެވެ.
މި ރަސްމިއްޔާތުގައި ޑރ.ޢަބްދުﷲ މައުސޫމް ވިދާޅުވީ ކުރިއަށް އޮތް ދުވަސްތަކުގައި މިފަދަ އިތުރު ޕްރޮގްރާމްތައް ހިންގާ ރިސޯޓުތަކުގެ އިމާމުންނަށް މި ދާއިރާއިން އިތުރަށް ތަޢުލީމާއި ތަމްރީނު ޙާސިލުކުރުމަށް މަގުފަަހިކޮށްދެއްވާނެކަމަށެވެ. އަދި އިމާމުންނާއި ޚަތީބުން ރިސޯޓުތަކުގައި ވެސް ތިބުމަކީ ވަރަށް މުޙިއްމުކަމެއް ކަމަށް މިނިސްޓަރ ވިދާޅުވިއެވެ.
ރިސޯޓުތަކުގެ މިސްކިތްތަކަށް ޚަތީބުން ތަމްރީނު ކުރުމަށް މިނިސްޓްރީ އޮފް ޓޫރިޒަމާއި މިނިސްޓްރީ އޮފް އިސްލާމިކު އެފެއާޒުން ގުޅިގެން 01 ޑިސެމްބަރ 2020އިން 2021 ނޮވެންބަރ 10އަށް ހިންގި މި ޕްރޮގްރާމަކީ 09 ބެޗަކަށް ބަހައިލައިގެން ހިންގި ޕްރޮގްރާމެކެވެ. ކޮންމެ ބެޗަކަށް ވެސް ކިޔަވައިދެއްވީ 01 މަސް ދުވަހަށެވެ. މި ތަމްރީނު ޕްރޮގްރާމްގައި ބައިވެރިވެފައި ވަނީ ޖުމްލަ 207 ބައިވެރިންނެވެ. މީގެ ތެރެއިން ޕްރޮގްރާމް ފުރިހަމަކުރެއްވީ 109 ބައިވެރިންނެވެ.
މިނިސްޓްރީ އޮފް އިސްލާމިކް އެފެއާޒްގެ ހޯލުގައި ބޭއްވި މި ރަސްމިއްޔާތުގައި ޕްރޮގްރާމްއިން ފާސްވި 87 ދަރިވަރަށް ވަނީ ސަނަދު ޙަވާލުކުރައްވައިފައެވެ. އަދި ސަނަދު ޙާސިލް ނުވާ ދަރިވަރުންނަށް 2022 ވަނަ އަހަރުގެ ޖަނަވަރީމަހުގައި އިތުރު ބެޗެއް ކުރިއަށް ގެންދިއުމަށް ހަމަޖެހިފައިވާކަމަށް ޑރ.އަޙްމަދު ޒާހިރު ޢަލީ ވަނީ ވިދާޅުވެފައެވެ.
ކައިރި ރަށްރަށުން އިމާމުންނާއި ޚަތީބުން ރިސޯޓުތަކަށް ގެނައުމުގައި ދިމާވާ ދަތިތައް ޙައްލުކޮށް ރިސޯޓުތަކުގައި އިމާމުންނާއި ޚަތީބުން ތަމްރީނުކުރުން މައިގަނޑު މަޤްޞަދެއްކަމުގައި ނިންމައިގެން ކުރިއަށް ގެންދިޔަ މި ޕްރޮގްރާމްގައި ޚުޠުބާ ކިޔާނެ ގޮތާއި ތިލާވާއާއި ނަމާދުގެ ފިޤުޙު އަދި ބަންގި ގޮވާނެ ގޮތުގެ ތަމްރީނުތައް ވަނީ ދީފައެވެ.
