މި އަހަރުގެ މިހައިތަނަށް ރާއްޖެއަށް 1.2 މިލިއަން ފަތުރުވެރިން އަތުވެއްޖެ
މިއަހަރުގެ މިހައިތަނަށް 1.2 މިލިއަން ފަތުރުވެރިން ރާއްޖެއަށް ޒިޔާރަތް ކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
އެ މިނިސްޓްރީން އާންމުކޮށްފައިވާ ހިސާބުތަކުން ދައްކާ ގޮތުގައި މިމަހުގެ 11 ވަނަ ދުވަހުގެ ނިޔަލަށް 1،212،528 ފަތުރުވެރިން ވަނީ ރާއްޖެއަށް އައިސްފައިވެއެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވާ ފަތުރުވެރިންގެ އަދަދާއި އަޅައިބަލާއިރު 151 އިންސައްތަ އިތުރު އަދަދެކެވެ. އަދި 2019 ވަނަ އަހަރުގެ މި މުއްދަތުގައި ރާއްޖެއަށް އައިސްފައިވާ 1.58 މިލިއަން ފަތުރުވެރިންނާއި އަޅައި ބަލާއިރު 23.5 އިންސައްތަ ދަށް އަދަދެކެވެ.
ރާއްޖެއަށް ފަތުރުވެރިން އަންނަ އަދަދުތަށް ދުވަހުން ދުވަހަކަށް ދަނީ އިތުރުވަމުންނެވެ. އެގޮތުން މިއަހަރުގެ ޖުލައި މަހުން ފެށިގެން މިހައިތަނަށް އެއްލައްކައަށް ވުރެ ގިނަ ފަތުރުވެރިން ކޮންމެ މަހަކު ރާއްޖެއަށް އައިސްފައިވެއެވެ. އެންމެ ގިނަ ފަތުރުވެރިން މިއަހަރު މިހާތަނަށް އައިސްފައި ވަނީ މިދިޔަ ނޮވެމްބަރު މަހުގައެވެ. އެ މަހުގައި 144،725 ފަތުރުވެރިން ޒިޔާރަތްކޮށްފައި ވެއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 4989 ފަތުރުވެރިން އާދެއެވެ. މިއަދަދަކީ 2019ވަނަ އަހަރާ އަޅާ ބަލާއިރު އިތުރު އަދަދެކެވެ.
