ފިލިޕިންސްގައި ހާލުގައި ޖެހުނު ދިވެހި ދަރިވަރުންނަށް ކާނާއާއި ބޯފެން ލިބިއްޖެ
ތޫފާން ރާއީގެ ސަބަބުން ފިލިޕިންސްގައި ހާލުގައި ޖެހުނު ދިވެހި ދަރިވަރުންނަށް ކާނާއާއި ބޯފެން ލިބިއްޖެ ކަމަށް ފޮރިން މިނިސްޓްރީން ބުނެފިއެވެ.
އެ މިނިސްޓްރީން ބުނީ ފިލިޕީންސްގައި ހާލުގައި ޖެހުނު ދިވެހި ދަރިވަރުންގެ ތެރޭގައި ޖުމްލަ 45 ދަރިވަރުން އެބަ ތިބި ކަމަށާއި ތޫފާނު ރާއީގެ ސަބަބުން އެސަރަހައްދުން ކަރަންޓު ކެނޑިފައިވާ ކަމަށެވެ. އެހެން ނަމަވެސް ދަރިވަރުންނަށް މިހާރު ކާނާއާއި ބޯފެން ލިބިފައިވާ ކަމަށާއި ހުރިހާ ދަރިވަރުންގެ ހާލު ވެސް އާންމު ގޮތެއްގައި ރަނގަޅުކަމަށް ފޮރިން މިނިސްޓްރީން ބުނެއެވެ.
ތޫފާނުގެ ސަބަބުން ފިލިޕީންސްގެ އެ ސަރަހައްދަށް ބޮޑެތި ގެއްލުންތަކެއް ވެފައި ވާތީ އެހީތެރިކަން ފޯރުކޮށްދިނުމަށް އެގައުމުގެ އިދާރާތަކަށް ދަތިތަކާ ކުރިމަތިވެފައިވާކަމަށް ވެސް ފޮރިން މިނިސްޓްރީން ފާހަގަކުރިއެވެ. އެކަމަކު ދިވެހި ދަރިވަރުންނަށް އިތުރު އެހީތެރިކަން ފޯރުކޮށްދިނުމަށް ފިލިޕީންސްގެ ސަފީރާއި، ފިލިޕީންސްގައި ހުންނަވާ ދިވެހިރާއްޖޭގެ ކޮންސުލް މެދުވެރިކޮށް މަސައްކަތްކުރަމުންދާކަމަށް ވެސް ފޮރިން މިނިސްޓްރީން ބުނެއެވެ.
އެ މިނިސްޓްރީން އިތުރަށް ބުނީ، އެތަނުން ބައެއް ދަރިވަރުން ބެލެނިވެރިންގެ އެދުމުގެ މަތިން އެމިނިސްޓްރީގެ އޮފިޝަލުން ވަނީ އިއްޔެއާ މިއަދު ބެލެނިވެރިންނާ ބައްދަލުކޮށްފައި ކަމަށެވެ.
މި އަހަރު އެ ގައުމަށް އެރި އެންމެ ބާރުގަދަ ތޫފާން ، ތޫފާން ރާއީގެ ސަބަބުން 204އަށް ވުރެ ގިނަ މީހުން މަރުވެފައިވާ ކަމަށް އެ ޤައުމުގެ ފުލުހުން ބުނެފައިވެއެވެ.
Ads by STO
