ނަޝީދަށް މަރުގެ އިންޒާރު ދިން ޔާފިސްގެ ޝަރީއަތުގެ މަރުހަލާތައް މަޑުޖައްސައިލައިފި
ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލާނެ ކަމަށް ބުނެ ތަކުރާރުކޮށް އިންޒާރުދިން އިސްމާއީލް ޔާފިސްގެ ނަފުސާނީ ހާލަތު ދެނެގަނެވެންދެން ޝަރީއަތުގެ މަރުހަލާތައް މަޑުޖައްސައިލާން ކްރިމިނަލް ކޯޓުން ނިންމައިފިއެވެ.
މިއަދު ކްރިމިނަލް ކޯޓުގައި ބޭއްވި އެ މައްސަލަތަކުގެ އަޑުއެހުމުގައި ނަފުސާނީ އަދި ޖިސްމާނީ އެއްވެސް ކަމެއް އުޅޭތޯއާއި އެފަދަ އެއްވެސް ސިއްހީ މައްސަލައަކަށް ފަރުވާ ހޯދައިފައިވޭތޯ ވެސް ގާޒީ ވަނީ ޔާސިފުއާ ސުވާލު ކުރައްވައިފައެވެ.
ގާޒީގެ ސުވާލުތަކަށް ޖަވާބުދެމުން ޔާސިފު ބުނީ، "ސްކިޓްސްފްރީނިއާ" ކިޔާ ނަފުސާނީ ބައްޔަކަށް އޭނާ 2013 ވަނަ އަހަރާ ހަމައަށް ފަރުވާ ހޯދި ކަމަށެވެ. އެއާ އެކު ގާޒީ ދީބަނާޒް ފަހުމީ ވަނީ ޔާސިފްގެ ސައިކޭޓްރިކް ރިޕޯޓެއް ތައްޔާރުކުރުމަށް ދައުލަތަށް އަންގަވައިފައެވެ.
ޔާސިފް ހައްޔަރުކޮށްފައި ވަނީ ފޭސްބުކްގައި ކުރި ކޮމެންޓެއްގައި، ރައީސް ނަޝީދު އަނބުރައި ރާއްޖެ ވަޑައިގެންފި ނަމަ އަބޫޖަހުލަށް ބަދުރު ހަނގުރާމައިގައި ހެދި ގޮތް ހަދައިލާނެ ކަމަށް ބުނެ މަރުގެ އިންޒާރު ދިނުމުންނެވެ. އޭނާއަކީ ރ.މީދޫ މީހަކާ ކައިވެނިކޮށްގެން އެ ރަށުގައި ދިރިއުޅެމުން އަންނަ މީހެކެވެ. އޭނާއަކީ މާލޭ މީހެއް ނަމަވެސް ދިރިއުޅެމުން އަންނަނީ މީދޫގައެވެ.
ޔާސިފް ހައްޔަރުކޮށްފައި ވަނީ އޮގަސްޓު މަހުގެ 23ވަނަ ދުވަހުއެވެ. ހައްޔަރުކޮށްގެން އޭނާ ފުރަތަމަ ގެންދިޔައީ އުނގޫފާރު ކޯޓަށެވެ. އެ ކޯޓުގެ ހުރުމަތް ކަނޑައިގެން ވެސް އޭނާ ވަނީ 15 ދުވަހަށް ޖަލަށް ލާން ހުކުމްކޮށްފައެވެ.
