ސުޝްމިތާއާއި ރޮހްމަން ވަކިވެއްޖެކަން ޔަގީންކޮށްދީފި
ބޮލީވުޑްގެ އެކްޓްރެސް ސުޝްމީތާ ސެންއާއި މަޝްހޫރު މޮޑެލް ރޮހްމަން ޝަލްއާ ދެމެދުގައި އޮތް ލޯބީގެ ގުޅުން މިހާރު ވަނީ ކެނޑިފައި ކަމަށް އެ ދެމީހުން ވެސް ޔަގީންކޮށްދީފިއެވެ.
އާރިޔާ ސީރީޒްއިން ފެނިގެންދާ ސުޝްމިތާ ވަނީ އެދެމީހުން ވަކިވިކަން ހާމަކޮށް، އޭނާގެ ސޯޝަލް މީޑިއާގައި ޕޯސްޓެއް ހިއްސާ ކޮށްފައެވެ. އެ ޕޯސްޓުގައި ސުޝްމީތާ ބުނެފައިވަނީ، އެ ދެމީހުންގެ ގުޅުން ފެށުނީ ރަހުމަތްތެރިކަމުން ކަމަށާއި ރަހުމަތްތެރިކަން އަދިވެސް ދެމިގެންދާނެ ކަމަށެވެ. ނަމަވެސް ލޯބީގެ ގުޅުން ކެނޑުނުތާ މިހާރު ކިތަންމެ ދުވަހެއް ވެފައިވާކަން ސުޝްމީތާ ވަނީ ހާމަކޮށްފައެވެ.
"އަހަރެމެން ފެށުނީ ރަހުމަތްތެރިންގެ ގޮތުގައި، އަހަރެމެން ތިބޭނީ ރަހުމަތްތެރިންގެ ގޮތުގައި، މި ގުޅުން ނިމުނުތާ އެތައް ދުވަހެއް، ނަމަވެސް ލޯބި އަދިވެސް ދެމިގެންދާނެ." އޭނާއާއި ރޮހްމަންގެ ފޮޓޯއެއް ޕޯސްޓްކުރަމުން ސުޝްމީތާ ލިޔެފައިވެއެވެ. ރޮހްމަން ވެސް ވަނީ ހަމަ އެ ޕޯސްޓު އޭނާގެ އިންސްޓަގްރާމް އެކައުންޓުގައި ވެސް ހިއްސާ ކޮށްފައެވެ.
ސުޝްމީތާ ސެންއާއި ރޮހްމާން ޝަލް ލޯބީގެ ގޮތުން ގުޅިފައި ވަނީ، 2018ވަނަ އަހަރުއެވެ. އެ ދެ މީހުން ފުރަތަމަ ވާހަކަ ދައްކައިފައި ވަނީ، އިންސްޓަގްރާމް މެސެޖަކުންނެވެ. އޭނާގެ އިންސްޓަގްރާމް ފޮޓޯތަކާއި ވީޑިއޯތަކުން ވެސް ރޮހްމަންއާ އެކު ސެންގެ ދަރިންނާއި އާއިލާއާ ގުޅިގެން އުޅޭ ތަން ފެނިފައިވެއެވެ.
މިދިޔަ މަހު ސުޝްމީތާގެ 46 ވަނަ އުފަން ދުވަހު ރޮހްމަން ވަނީ އޭނާގެ އިންސްޓަގްރާމް ސްޓޯރީގައި ސުޝްމީތާއަށް ތަހުނިޔާ ކިޔައިފައެވެ. "ހެޕީ ބާތްޑޭ ބާތްޑޭ ބޭބްޝް" ލިޔެފައިވާއިރު ހިތާއި ހަގް އިމޯޖީތައް ވެސް ޖަހައިފައިވެއެވެ.
މަސައްކަތުގެ މައިދާނުގައި ސުޝްމީތާ ސެން އެންމެ ފަހުން ފެނިގެން ގޮސްފައި ވަނީ އާރިޔާ ސީޒަން 2 އިންނެވެ. އާރިޔާގެ ސީޒަން 1 ވަނީ އިންޓަނޭޓަނަލް އެމީސް 2021އަށް ނޮމިނޭޓުވެފައެވެ.
