މިއަހަރު ރާއްޖެ އައި ފަތުރުވެރިންގެ އަދަދު 1.3 މިލިޔަނަށް
މިއަހަރު ރާއްޖެއަށް ޒިޔާރަތްކުރާނެ ކަމަަށް އަންދާޒާ ކުރި 1.3 މިލިޔަން ފަތުރުވެރިންގެ އަމާޒު އަންނަ އަންގާރަ ދުވަހުގެ ނިޔަލަށް ހާސިލްވާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން މިމަހުގެ 22ވަނަ ދުވަހުގެ ނިޔަލަށް ރާއްޖެއަށް 1،271،020 ފަތުރުވެރިން ވަނީ ޒިޔާރަތްކޮށްފައެވެ.
މިނިސްޓަރ މައުސޫމް ކުރެއްވި ޓްވިޓެއްގައި ވިދާޅުވީ، ރާއްޖެއިން މިއަހަރު ކަނޑައެޅި އަމާޒު ހާސިލްވެފައިވާ ކަމަށެވެ. މި އަހަރު އަމާޒު ކަނޑައަޅައިފައި އޮތީި އެއް މިލިއަން ފަތުރުވެރިން ރާއްޖެ އަންނާނެ ކަމަށެވެ. އެ އަމާޒު 29 އޮކްޓޯބަރގައި ހާސިލްވެފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ މިހާރު އަމާޒަކީ 1.3 މިލިއަން ފަތުރުވެރިން މިމަހުގެ 28ގެ ނިޔަލަށް ހަމަކުރުންކަމަށް ކަމަށެވެ.
ރާއްޖެއަށް މިހާރު އެންމެ ގިނައިން ފަތުރުވެރިން އަންނަނީ އިންޑިއާއިންނެވެ. މިއަހަރުގެ މިހައިތަނަށް އިންޑިއާއިން ރާއްޖެއަށް 286،434 ފަތުރުވެރިން ވަނީ ޒިޔާރަތްކޮށްފައެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 5000އަށް ވުރެ ގިނަ ފަތުރުވެރިން އާދެއެވެ.
