ނަފްރަތު އުފެދޭ ކަންކަމާ ދުރުވެ، ސުލްހަވެރި ސިޔާސީ ހަރަކާތްތަކުގައި ދެމިތިބުމަށް ރައީސް ނަޝީދު ގޮވައިލައްވައިފި
ނަފްރަތު އުފެދޭ ކަންކަމާ ދުރުވެ، ސުލްހަވެރި ސިޔާސީ ހަރަކާތްތަކުގައި ދެމިތިބުމަށް ރައީސް ނަޝީދު ގޮވައިލައްވައިފިއެވެ.
އެމަނިކުފާނު މިފަދައިން ވިދާޅުވެފައި ވަނީ މިއަދު ފާހަގަކުރަމުންދާ ގައުމީ އެއްބައިވަންތަކަމުގެ ދުވަހުގެ މުނާސަބަތުގައި ކުރެއްވި ޓްވީޓެއްގައެވެ.
ރައީސް ނަޝީދު ވިދާޅުވީ 2004ވަނަ އަހަރު ރާއްޖެއަށް ކުރިމަތިވި ސުނާމީ ކާރިސާއަށް ފަހު މި ދުވަސް ފާހަގަ ކުރަމުން އައީ ގައުމީ އެއްބައިވަންތަ ކަމުގެ ދުވަހުގެ ގޮތުގައި ކަމަށާއި ރާއްޖޭގެ ވެރިކަން ކުރާ މައި ޕާޓީ އެމްޑީޕީއާއި އެ ޕާޓީގެ ވާދަވެރިން ވެސް ބިރުވެރިކަމާއި ނަފްރަތު އުފެދޭ ކަންކަމާއި ދުރުވެ ސުލްހަވެރި ސިޔާސީ ހަރަކާތްތަކުގައި ދެމިތިބުމަށް ގޮވައިލާ ކަމަށެވެ.
ކޮންމެ އަހަރެއްގެ ވެސް ޑިސެމްބަރު މަހުގެ 26ވަނަ ދުވަސް ގައުމީ އެއްބައިވަންތަކަމުގެ ދުވަހުގެ ގޮތުގައި ފާހަގަ ކުރަމުންދާއިރު މި ދުވަސް ރަމްޒުކޮށްދެނީ ސުނާމީ ކާރިސާގައި ދިވެހިން ދެއްކި ރީތި ނަމޫނާއަށެވެ. ސުނާމީ ކާރިސާއަށް މިއަދު ފުރެނީ 17އަހަރެވެ. މި ހިތްދަތި ޙާދިސާގައި ރާއްޖެއިން 82 މީހުން ދުނިޔެއާ ވަކިވެގެން ދިޔައިރު، 26 މީހަކު ވަނީ ގެއްލިފައެވެ.
