އޭސީސީގެ ރައީސްއާއި ބާކީ ތިބި ދެ މެންބަރުން އިސްތިއުފާ ދެއްވައިފި

އެންޓި ކޮރަޕްޝަން ކޮމިޝަން (އޭސީސީ)ގެ ރައީސް މަރިޔަމް ޝިއުނާއާއި ބާކީ ތިބި ދެ މެންބަރުން އިސްތިއުފާ ދެއްވައިފިއެވެ.

Ads by Sosun Fihaara

އޭސީސީގެ ރައީސްއާއި ބާކީ ތިބި ދެ މެންބަރުން އިސްތިއުފާ ދެއްވައިފިކަން އެ ކޮމިޝަންގެ އިންފޮމޭޝަން އޮފިސަރ ހަސަން މަނިކު "ދެން" އަށް ޔަގީންކޮށްދެއްވަމުން ވިދާޅުވީ، ކޮމިޝަންގެ ރައީސް ޝިއުނާއާއި މެންބަރުން ކަމުގައިވާ ފާތިމަތު އަނޫލާ އަދި އައިޝަތު އަބްދުﷲ މިއަދުގެ ވަގުތެއްގައި އިސްތިއުފާ ދެއްވާފައިވާ ކަމަށެވެ.

އޭސީސީގެ ރައީސްއާއި މެންބަރުން މިއަދު އިސްތިއުފާ ދެއްވާފައި މިވަނީ، އެ ކޮމިޝަނަށް މި ސަރުކާރުން އައްޔަނު ކުރި މެންބަރުންނަށް ނަތީޖާ ނުނެރެވޭ ކަމަށް ރައްޔިތުންގެ މަޖިލީހުގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމައި، އެ މެންބަރުން ވަކިކުރަން ތަޅުމަށް ފޮނުވަން އިއްޔެ ނިންމާފައި ވަނިކޮށެވެ.

މިގޮތަށް ނިންމީ އިއްޔެ އެ ކޮމިޓީގައި ބައިވެރިވި އަށް މެންބަރުންގެ ތެރެއިން ފަސް މެންބަރުންގެ ވޯޓުންނެވެ. އެއީ ވެރިކަން ކުރާ އެމްޑީޕީގެ ފަސް މެންބަރުންނެވެ. އޭސީސީ މެންބަރުން ވަކި ކުރަން ފާސްކޮށް، މައްސަލަ މަޖިލީހުގެ ތަޅުމަށް ފޮނުވުމަށް ހުށަހެޅުއްވީ، އިނގުރައިދޫ ދާއިރާގެ މެންބަރު ހަސަން އަޙްމަދު (ހަސަންޓޭ)އެވެ. އެ ހުށަހެޅުމަށް ތާއީދު ކުރެއްވީ، ބިލެއްދޫ ދާއިރާގެ މެންބަރު އަހްމަދު ހަލީމް (ދޮންބިލަތް)އެވެ.

އޭސީސީގެ ފަސް މެންބަރުންގެ ތެރެއިން ދެ މެންބަރަކު، މެންބަރުން ވަކިކުރުމުގެ މަސައްކަތް މަޖިލީހުން ފަށައިފައި ވަނިކޮށް ވަނީ މީގެ ކުރިން އިސްތިއުފާ ދެއްވައިފައެވެ. އެއީ، އިބްރާހީމް ޝަކީލްއާއި އަލީ އަޝްރަފެވެ.

އޭސީސީގެ މެމްބަރުން ވަކިކުރުމަށް ރައްޔިތުންގެ މަޖިލީހަށް ހުށަހެޅި މައްސަލަ ދިރާސާ ކުރުމަށް ބޭއްވި ކޮމިޓީ ބައްދަލުވުމަށް ކުޑަ ވަގުތުކޮޅަކަށް ވެފައިވަނިކޮށް އޭސީސީން އިއްޔެ ނެރުނު ދިގު ބަޔާނެއްގައި ވަނީ، އެ ކޮމިޝަންގެ މެމްބަރުންނަށް ކުރާ ތުހުމަތުތަކަށް ދިފާއުވެ ޖުމްލަ 23 ނުކުތާއެއް ފާހަގަކޮށްފައެވެ.

އެގޮތުން އެ ނުކުތާތަކުގައި އޭސީސީން ވަނީ އޮޑިޓާ ޖެނެރަލް އޮފީހުން އެކުލަވައިލި އޮޑިޓް ރިޕޯޓުގައި ފަސް އަހަރު ދުވަހުގެ މުއްދަތުގައި ކޮމިޝަނުން ކުރި މަސައްކަތަށް ބަލައިފައިވީ ނަމަވެސް މިހާރު ތިއްބެވި މެމްބަރުންގެ ދައުރުގެ ތެރެއިން އެ އޮޑިޓުގައި ހިމެނިފައި ވަނީ އެންމެ 10 މަސް ދުވަހުގެ މުއްދަތެއް ކަމަށެވެ. އަދި އެ މުއްދަތުގައި އޭސީސީން ބޮޑެތި މަސައްކަތްތަކެއް ކުރަމުން ދިޔައީ ނުނިމި ގިނަ މަސައްކަތްތަކެއް ހުރުމާ އެކު މަސައްކަތްތައް އަވަސްކުރުމަށް އައު އުސޫލުތަކެއް ހެދުންކަމަށް ވެސް ކޮމިޝަނުން ބުންޏެވެ. މީގެ އިތުރުން ކޮވިޑް-19ގެ ސަބަބުން މައްސަލަތަކުގެ ތަހުގީގު މަރުހަލައިގައި ހުރަސްތަކެއް ހުރި ކަމަށާއި ހާއްސަކޮށް އަތޮޅުތެރެއަށް ދަތުރުކުރުމަށް ދަތިތަކެއް ހުރިކަމަށް ބަޔާނުގައި ބުންޏެވެ.

އޭސީސީން ބުނީ ކޮމިޝަނުގެ މަސްއޫލިއްޔަތު އަދާކުރުމުގައި އެންމެ އިސް ވާޖިބަކަށްވީ، ވަކި ފަރާތަކަށް ބުރަނުވެ ޖެހިލުންވުމެއް ނެތި މަސްއޫލިއްޔަތު އަދާކުރުން ކަމަށެވެ. މިހައިތަނަށް ކޮށްފައިވާ މަސައްކަތްތައް ވަޒަންކުރުމުން ވެސް އެކަން ފެނިގެންދާނެ ކަމަށާއި ސިޔާސީގޮތުން ވަކި ފަރާތަކަށް ބުރަ ނުވާ ކަމާއި، ކޮމިޝަނަށް ނުފޫޒު ނުފޯރުވޭނެކަން ވާނީ ސާބިތުކޮށްދީފައިކަމަށް ބަޔާނުގައި ބުންޏެވެ.