މޫސަ ނަޝީދަށް: މަނިކުފާނުގެ ވެރިކަމުގައި ހުޅުމާލެއިން ފްލެޓާއި، ގޯތި ބެހިގޮތް ހާމަކުރައްވަން ކެރޭނެތޯ؟
ކުރީގެ ރައީސް މުހައްމަދު ނަޝީދުގެ ވެރިކަމުގައި ހުޅުމާލެއިން ފްލެޓާއި ގޯތި ބެހި ގޮތުގެ ތަފްސީލް ހާމަކުރަންވަން ކެރިވަޑައިގަންނަވާނެތޯ އެމްޑީޕީގެ ކުރީގެ ޗެއާޕާސަން ،މޫސާ މަނިކު އެމްޑީޕީގެ ރައީސް މުހައްމަދު ނަޝީދާ ސުވާލު ކުރައްވައިފިއެވެ.
މާލޭގައި ދިރިއުޅޭ އާއްމުންނަށް ބިން ލިބޭނެ ގޮތެއް ނެތި، ހުޅުމާލެއިން ބިން ކުއްޔަށް ދޭތީ ކަންބޮޑުވެ، ވަޑައިގަންނަވާ ކަމަށް ރައީސް ނަޝީދު ޚިޔާލު ފާޅު ކުރެއްވުމާ ގުޅިގެން މޫސަ ވިދާޅުވީ މާޒީގައި ކަންކަން ކުރައްވައިފައިވާ ގޮތް މިހާރު ހާމަކޮށްފި ނަމަ ސަރުކާރުން މާލޭ ރައްޔިތުންނާ މެދު އަމަލުކޮށްފައިވާ ގޮތް ހާމަވާނެކަމަށެވެ.
މޫސަ އިތުރަށް ވިދާޅުވީ މާލެ އުފަން އެތައް ރައްޔިތުންނަށް ބިން ނުލިބި ތިބެ، ސަރުކާރުން ހިލޭ ބިންދޫކުރާ ނަމަ އެންމެންނަށް ނުލިބޭގޮތަށް މާލޭގެ ބިން ވަކިބަޔަކަށް ދީގެން ނުވާނެ ކަމަށާއި އެގޮތަށް ވިއްކައިގެން ވެސް ނުވާނެ ކަމަށެވެ.
މޫސަ ވިދާޅުވީ ނިމިދިޔަ ވެރިކަން ތަކުގައި އެތަކެއް ފްލެޓަކާއި، ބިންތައް ބަހައި ހުސްކުރަމުންދިޔައިރު، މާލޭގައި ބިން ނުލިބިފައި ތިބި ރައްޔިތުންނަށް އޭގެ ތެރެއިން ލިބުނީ ކިތައް ފްލެޓާއި، ކިތައް ބިންތޯ މިއަދު ސުވާލު ކޮށްލުން ރަނގަޅު ކަމަށެވެ.
ހުޅުމާލޭ ދެވަނަ ފިޔަވަހިން ގޯތި ވިއްކުމަށް ހަމަޖެހިފައި ވަނީ، 1،603.07 އަކަފޫޓާއި، 2،633.82 އަކަފޫޓާ ދެމެދުގެ، ޖުމްލަ 60 ބިމެވެ.
