އައްޑޫ ސިޓީ ކައުންސިލުން ވަކިވާން އެދި، މީދޫގެ ބައެއް ރައްޔިތުން ޕެޓިޝަނެއްގައި ސޮއިކުރަނީ
އައްޑޫ ސިޓީ ކައުންސިލްގެ ދަށުން ހުޅުދޫއާއި މީދޫ ވަކިވާން އެދި، "އަފިރިންގެ ކައުންސިލް އަފިންނަށް"ގެ ނަމުގައި ބޮޑު ހަރަކާތެއް ހިންގަން ފަށައިފިއެވެ.
ހުކުރުދުވަހު ސޮއިކުރަން ފެށި މި ޕެޓިޝަނުގައި މީދޫގެ ގިނަ ރައްޔިތުންގެ ސޮއި ހޯދުމަށް މިކަމުގައި އިސްކޮށް އުޅޭ ޓީމުން ދަނީ މަސައްކަތް ކުރަމުންނެވެ. އެގޮތުން ޖުމުލަ ހަތަރު ޓީމަކަށް ބަހައިލައިގެން ކުރިއަށް ގެންދާ މި ހަރަކާތުގައި މީދޫގެ އާބާދީގެ މެޖޯރިޓީގެ ސޮއި ލިބޭނެކަމަށް އެ ޓީމުން ވަނީ ބުނެފައެވެ.
ރައްޔިތުން އެދޭ ނަމަ ހުޅުދޫއާއި މީދޫ އައްޑޫ ސިޓީ ކައުންސިލުން ވަކިކުރަން ޤާނޫނަށް ގެންނަން ޖެހޭ އިސްލާހުތައް ހުށަހަޅާނެ ކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ދާދި ފަހުން ވަނީ ވިދާޅުވެފައެވެ.
އައްޑޫ ސިޓީ ކައުންސިލުން ހުޅުދޫ އަދި މީދޫއާ މެދު ތަފާތުކުރުން ގެންގުޅޭތީ މީގެ ކުރިން ވެސް އެ ދެ އަވަށުގެ ރައްޔިތުން މި މައްސަލަ ފެންމަތިކޮށްފައި ވެއެވެ.
