ވަށުގިރި ކުންފުނި ފަސް ލައްކަ ރުފިޔާއިން ޖޫރިމަނާކޮށްފި
ވ. ވަށުގިރި ތަރައްޤީ ކުރުމުގައި އެންވަޔަރަމަންޓް އިމްޕެކްޓް އެސެސްމަންޓް (އީއައިއޭ)އާ ހިލާފުވުމުން އެ ރިސޯޓު 593،750 ރުފިޔާއިން ޖޫރިމަނާކޮށްފިއެވެ.
އީޕީއޭއިން ނެރުނު ބަޔާނެއްގައި ބުނެފައި ވަނީ ވަށުގިރި ޕްރައިވެޓް ލިމިޓެޑްއިން، ވަށުގިރީގައި ރިސޯޓެއް ތަރައްގީ ކުރުމުގެ މަޝްރޫއުގެ ބައެއް މަސައްކަތްތައް ތިމާވެށްޓަށް އަސަރުފޯރާނެ މިންވަރު ބަޔާންކުރާ ރިޕޯޓު (އީއައިއޭ) ގަވައިދާ ހިލާފަٍށް ހަދައިފައިވާ ކަމަށެވެ.
އެހެންކަމުން، ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން ހަދައިފައިވާ ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާޢިދުގެ 16ވަނަ މާއްދާގެ ދަށުންނާއި ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާ ބެހޭ ގަވާއިދަށް ރިޢާޔަތްކޮށް ޖުމްލަ -/593،750 ރުފިޔާއިން ވަށުގިރި ޕްރައިވެޓް ލިމިޓެޑް ޖޫރިމަނާކޮށްފައިވާކަމަށް އީޕީއޭއިން ބުނެފައިވެއެވެ.
ޖޫރިމަނާ ފައިސާ، 30 ދުވަހުގެ ތެރޭގައި ދެއްކުމަށް އީޕީއޭއިން ވަނީ އެކުންފުންޏަށް އަންގައިފައެވެ.
މިފަހުން އީޕީއޭއިން ވަނީ ގަވާއިދާ ހިލާފަށް މަސައްކަތް ކުރުމުން ޕެރެޑައިސް ރިސޯޓްސް ޑިވެލޮޕްމަންޓް އެންޑް މެނޭޖްމަންޓް ޕްރައިވެޓް ލިމިޓެޑް ވެސް 402,500 ރުފިޔާއިން ޖޫރިމަނާކޮށްފައެވެ.
