ރައްކާތެރިކަމުގެ ފިޔަވަޅުތައް ހަރުކަށިކުރަން ރައީސް މައުމޫން ގޮވައިލައްވައިފި
ކޮވިޑް-19ގެ ވޭދަނަތައް އަނެއްކާ ވެސް އިތުރުވަމުންދާތީ ފިޔަވަޅުތައް ހަރުކަށި ކުރަން ކުރީގެ ރައީސް މައުމޫން އަބްދުލްގައްޔޫމް ގޮވައިލައްވައިފިއެވެ.
ރައީސް މައުމޫން ރޭ ކުރެއްވި ޓްވީޓެއްގައި ވިދާޅުވެފައި ވަނީ ރާއްޖޭގައި ކުއްލިއަކަށް ކޮވިޑްގެ އަދަދުތައް މަތިވަމުންދާ ކަމަށާއި ފިޔަވަޅުތައް ހަރުކަށިކޮށް، ރަނގަޅު ގޮތެއްގައި ތަންފީޒުކުރަން ޖެހޭ ކަމަށެވެ.
ކުރިއަށް އޮތް ތިން ހަފްތާއަކީ ރާއްޖޭގައި ކޮވިޑް-19 ވަރަށް ބޮޑަށް ފެތުރިގެން ހިނގައިދާނެ ތިން ހަފްތާކަމަށް ސިއްހީ ދާއިރާގައި މަސައްކަތްކުރައްވާ މާހިރުން ވިދާޅުވަމުން ގެންދަވާތީ މި ބަލިމަޑުކަމުން ސަމާލުވުމަށް ރައީސް އިބްރާހިމް މުހައްމަދު ޞާލިހު ވެސް ވަނީ އާންމުންނަށް އިލްތިމާސް ކުރައްވައިފިއެވެ.
ރާއްޖޭގައި ކޮވިޑް-19ގެ ބަލިމަޑުކަން ވަރަށް ބޮޑަށް ކޮންޓްރޯލް ކުރެވިފައި އޮތުމަށް ފަހު މިހާރު އަނެއްކާ ވެސް ބައްޔަށް ފައްސިވާ އަދަދުތައް ދަނީ ގިނަވަމުންނެވެ. އެގޮތުން ފައްސިވާ މީހުންގެ އަދަދު 200އަށް ވުރެ މަތީގައި އުޅޭތާ މިހާރު ދެ ދުވަސް ވެއްޖެއެވެ.
