ޑްރަގުގެ ވާހަކަ ދައްކަވަނީ އިންޑިއާ ސިފައިން ބޭލުމަށް ގޮވާ އަޑުމަޑުކުރުމަށް: ސައީދު
ޑްރަގުގެ ވާހަކަ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދައްކަވަނީ އިންޑިއާ ސިފައިން ބޭލުމަށް ގޮވައިލާ އަޑުމަޑުކުރުމަށް ކަމަށް އިދިކޮޅު ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެއެވެ.
ސައީދު މި ފަދައިން ވިދާޅުވީ މަސްތުވާތަކެތީގެ ވިޔަފާރި ހުއްޓުވަން ކުރާ މަސައްކަތާ މެދު ބަޔަކު ހިތްހަމަނުޖެހުނަސް، އެކަން ހުއްޓައިނުލާނެ ކަމަށް ރައީސް ޞާލިޙް ވިދާޅުވުމާ ގުޅިގެންނެވެ.
މިކަމާ ގުޅިގެން ސައީދު ކުރެއްވި ޓްވީޓެއްގައި ވިދާޅުވީ ޑްރަގުގެ ވާހަކަ މާގިނައިން ދައްކަނީ ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަށް ގޮވައިލައި ކުރަމުންދާ ކެމްޕެއިންގެ އަޑުމަޑު ކުރުމަށް ކަމަށެވެ. އަދި މި ޑްރާމާ ކުޅެމުންދާ ފަރާތްތަކަށް ރާއްޖެއަށް އެތެރެކުރާ ޑްރަގު ރާއްޖޭގެ ކަނޑުގެ ސަރަހައްދަށް ވައްދައިފައި އެތަކެތި ހިފަން މާފަސޭހަ ވާނެކަމަށް ވެސް ސައީދު ވިދާޅުވިއެވެ.
ނ. ލަންދޫ ބަނދަރު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މަސްތުވާތަކެތީގެ މައްސަލައަކީ ރާއްޖޭގައި މިހާރު އޮތް އެންމެ ބޮޑު އެއް މައްސަލަ ކަމަށާއި އެކަން ހުއްޓުވަން ގިނަ މަސައްކަތްތަކެއް ސަރުކާރުން ކުރަމުންދާ ކަމަށެވެ. އަދި މަސްތުވާތަކެތީގެ މައްސަލަ ހައްލުކުރަން ދާދި ފަހުން އެކުލަވައިލި ޓާސްކް ފޯހުގެ މަސައްކަތުގެ ނަތީޖާ މިއަހަރުގެ މެދު ތެރޭގަައި ފެންނަން ފަށާނެ ކަމަށް ވެސް ރައީސް ވިދާޅުވިއެވެ.
އިންޑިއާ އައުޓްގެ ވާހަކަ ދައްކަނީ ޑްރަގުގެ ވާހަކައާއި އެމްއެމްޕީއާރުސީގެ ވައްކަމުގެ ވާހަކައިގެ އަޑުމަޑުކޮށްލެވޭނެ ކަމަށް.