އިންތިޚާބު ކާމިޔާބުކުރާނީ ބޮޑުތަފާތަކުން، ރައީސް ޔާމީން ކޮމަންޑޫ ދާއިރާއަށް ވަޑައިގަންނަވަން ލަދުގަންނަން ޖެހޭ: ރާޝިދު
ކޮމަންޑޫ ދާއިރާގެ ބައި-އިލެކްޝަން އެމްޑީޕީން ކާމިޔާބު ކުރާނީ ބޮޑު ތަފާތަކުން ކަމަށް އެ ޕާޓީގެ ޓިކެޓްގައި ވާދަ ކުރައްވާ ކެނޑިޑޭޓް މުޙައްމަދު ރާޝިދު ވިދާޅުވެއްޖެއެވެ.
ކޮމަންޑޫ ދާއިރާގެ ބައި-އިލެކްޝަނެއް ބާއްވަން ޖެހުނީ އެ ދާއިރާގެ މެމްބަރު ހުސެއިން ވަޙީދު ނިޔާވުމާ ގުޅިގެންނެވެ. 2019ވަނަ އަހަރު އޮތް މަޖިލިސް އިންތިޚާބުގައި ކޮމަންޑޫގެ ގޮނޑި އޭނާ ކާމިޔާބު ކުރެއްވީ، ޕީއެންސީގެ ކެނޑިޑޭޓްއާ ވާދަކޮށް 332 ވޯޓްގެ ބޮޑު ތަފާތަކުންނެވެ.
ރާޝިދުގެ ކެންޕެއިން ރަސްމީކޮށް ލޯންޗް ކުރުމަށް ރޭ ބޭއްވި ޖަލްސާގައި ރަޝީދު ވިދާޅުވީ، އެމްޑީޕީން މި ގޮނޑި ކާމިޔާބު ކުރާނީ މަރުހޫމް ހުސެއިން ވަޙީދު ސަރުކާރާ ގުޅިގެން ފައްޓަވައިފައި ހުރި މަސައްކަތްތައް، އެ ސްޕީޑްގައި ކުރިޔަށް ގެންދިއުމަށް ކަމަށެވެ. އަދި ﷲ އިރާދަފުޅާ އެކު، ބޮޑު ތަފާތަކުން އިންތިޚާބު ކާމިޔާބު ކުރައްވާނެ ކަމަށް ރާޝިދު ވިދާޅުވިއެވެ.
ރާޝިދުގެ އިތުރުން ޕީޕީއެމްއިންނާއި އެމްއެންޕީން އެ ދާއިރާއަށް ވަނީ ކުރިމަތި ލައިފައެވެ.
ރާޝިދުގެ ވާހަކަފުޅުގައި ވިދާޅުވީ، ކޮމަންޑޫ ދާއިރާއަކީ ވޭތުވެދިޔަ ސަރުކާރުތަކުން ވަރަށް ބޮޑަށް އިޙްމާލުވެފައިވާ ދާއިރާއެއް ކަމަށެވެ. އަދި ދާއިރާއަށް ކަންތައްތަކެއް ކޮށްދިނީ އެމްޑީޕީން ކަމަށް ފާހަގަކޮށް، ދާއިރާގެ ރައްޔިތުން ކޮންމެ އިންތިޚާބެއް އަޔަސް އެކަން ފާހަގަ ކޮށްދޭނެ ކަމަށް ރާޝިދު ވިދާޅުވިއެވެ.
"އަޅުގަނޑުމެންގެ ދާއިރާއަކީ ވޭތުވެދިޔަ ސަރުކާރުން ވަރަށް ބޮޑަށް އިހްމާލުވެފައި އޮތް ދާއިރާއެއް. ވޭތުވެދިޔަ ދިގު މާޒީގައި ވަރަށް ބޮޑަށް ދޫކޮށްލެވިފައިވާ އޮތް ދާއިރާއެއް، އެއްވެސް އަޅާލުމެއް ނެތި، ބޮޑެތި އިޙްމާލުވެފައިވާ ދާއިރާއެއް. މި ދާއިރާ ކޮޅަށް ޖެހީ، އެމްޑީޕީގެ މި ސަރުކާރުން" ރަޝީދު ވިދާޅުވިއެވެ.
ޕީޕީއެމްގެ ކެނޑިޑޭޓްގެ ކެންޕެއިން ފައްޓަވައިދެއްވުމަށް އިދިކޮޅު ލީޑަރު ރައީސް ޔާމިީން ކޮމަންޑުއަށް ވަޑައިގަންނަވާތީ، ރާޝިދު ވަނީ އެކަމަށް ފާޑު ވިދާޅުވެފައެވެ. މިގޮތުން ވިދާޅުވީ، ވެރިކަމުގައ ހުންނެވިއިރު، ރައީސް ޔާމީންގެ ސަޕޯޓަރުން ކުރުބާ ހަދައިގެން ނިކުމެ، ގޮޑުދޮށުގައި އެތައް ދުވަހަކު ތިބި ކަމަށާއި ނަމަވެސް ފަސް އަހަރުގެ ދައުރެއް ނިމުނުއިރު، ކޮމަންޑުއަށް އެންމެ ފަހަރަކު ވެސް ދަތުރުފުޅު ކުރައްވައިފައި ނުވާ ކަމަށެވެ.
"ފާއިތުވި ފަސް އަހަރު ދުވަހުގެ ސަރުކާރުގެ ވެރިން، މިއަދު ކެނޑިޑޭޓުން ގޮވައިގެން، މި އަތޮޅަށް، މި ދާއިރާއަށް ދަތުރު ކުރާ ވާހަކަ ނޫސްތަކުގެ ހެޑްލައިންއިން ފެންނައިރު، އަޅުގަނޑު ހިތަށް އަރާ ވާހަކައަކީ، އެ ބޭފުޅުންގެ ބާރާއިއާރާއި، ވެރިކަމުގެ ލައްޒަތު އޮތްއިރު މި ތިންރަށް ނުފެނުނީ ކީއްވެގެންތޯއޭ. މި ތިން ރަށުން ކުރެ ރަށަކަށް، ބޮޑެތި ލޯންޗް ފަހަރުގައި ވަށައިގެން ފޮނު އަރުވަމުން ދުއްވި އިރު، މި ތިން ރަށުން ކުރެ ރަށަކަށް އަރާލާ، ރައްޔިތުން ކޮބައިތޯ އަހަން ނުކެރުނީ ކީއްވެގެން ބާވައޭ." ރާޝިދު ވިދާޅުވިއެވެ.
