ތަދުމަޑުކަމުން އަރައިގަނެވުނީ ރައްޔިތުންގެ ޙައްޤުގައި އެޅި ފިޔަވަޅުތަކުން: ޝާހިދު

ކޮވިޑް-19އާ އެކު މުޅި ދުނިޔެއަށް ކުރިމަތިވި، ތަދުމަޑުކަމުން އަރައިގަނެވުނީ، އަމިއްލަ އެދުމެއް ނެތި، ރައްޔިތުންގެ ޙައްޤުގައި ސަރުކާރުން އެޅި އަވަސް ފިޔަވަޅުތަކުގެ ސަބަބުން ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

Ads by Sosun Fihaara

ކޮމަންޑޫގައި، އެމްޑީޕީގެ ޕާޓީގެ ޓިކެޓްގައި އެ ޕާޓީއަށް ވާދަ ކުރައްވާ ކެނޑިޑޭޓަށް ތާއީދު ހޯއްދެވުމަށް އެ ރަށުގައި ރޭ ބޭއްވި ޖަލްސާގައި ވާހަކަފުޅު ދައްވަމުން ޝާހިދު ވަނީ ކޮވިޑާ އެކު ރައީސް ޞާލިޙްގެ ސަރުކާރުން އެޅި ފިޔަވަޅުތަކަށް ވަރަށް ބޮޑަށް ތައުރީފް ކުރައްވައިފައެވެ.

"ދިވެހިރާއްޖެއިން ބޭރަށް އަޅުގަނޑުމެން ގުޅިފައި އޮތް މިންވަރު ފެނިގެން ދިޔައީ. ދިވެހިރާއްޖޭގެ ކޮން ރައްޔިތަކަށްތޯ ކާބޯތަކެތީގެ ދަތިކަމެއް ދިމާވީ. އަސާސީ ބޭސް ލިބުމުގައި ދައްޗެއް ދިމާވީ، އަސާސީ ކާބޯތަކެއްޗަށް ދައްޗެއް ދިމާވީ. އެއްވެސް ކަމަކަށް ދައްޗެއް ދިމާވީ" އދ.ގެ އާއްމު މަޖިލީހުގެ ރައީސްކަން ވެސް ކުރައްވަމުން ގެންދަވާ ޝާހިދު ވިދާޅުވީ، ރާއްޖެ ބަނޑަށް ނުޖެހި ސަލާމަތްވީ ސަރުކާރުން އެޅުއްވި ހަރުދަނާ ފިޔަވަޅުތަކުގެ ސަބަބުން ކަމަށެވެ.

"ދަތި އުދަނގޫ ހާލަތްތަކުގައި އަޅަން ޖެހޭ ފިޔަވަޅުތައް ދުރާލާ ވިސްނާ، ރާވައިގެން ސަރުކާރަކުން އެޅީމަ ލިބޭނެ މިއީ އަމިއްލަ އެދުމެއް ނެތި، ސީދާ ރައްޔިތުންގެ ޙައްޤުގައި ފިޔަވަޅު އަޅައިގެން އޭގެ ހެޔޮ ނަތީޖާ މިއަދު މި ފެންނަނީ"

މުޅި ދުނިޔެ ބަންދުވެފައި އޮއްވާ ފަތުރުވެރިކަން ހުޅުވައިލާ، ރާއްޖޭގެ ބޯޑަރު ހުޅުވައިލިކަން ފާހަގަ ކުރައްވަމުން ޝާހިދު ވިދާޅުވީ އެކަންތައް ކުރެއްވީ ރައީސް ޞާލިޙްގެ ހިކުމަތު އަމަލީގެ ދަށުން ކަމަށެވެ . އަދި އެއާއެކު ރާއްޖޭގެ އިޤްތިޞާދު އަލުން ހިނގައިގަތްކަން ފާހަގަ ކުރެއްވިއެވެ.

ފޯކައިދޫގައި ބޭއްވި ޖަލްސާގެ ތެރެއިން | މި ޖަލްސާއަށް މިއަދު އެމްޑީޕީގެ އިސް ބައެއް ބޭފުޅުން އެ ރަށަށް ވަޑައިގަތް

ޝާހިދުގެ ވާހަކަފުޅުގައި ރާއްޖޭގެ ވެކްސިން ޕްރޮގްރާމުގެ ކާމިޔާބުކަމާ ގުޅޭ ގޮތުން ވެސް ވަނީ ވާހަކަފުޅު ދައްކަވައިފައެވެ. މިގޮތުން ރާއްޖޭގައި 80އިންސައްތަ އަށް ވުރެ ގިނަ މީހުންނަށް ވެކްސިން ދީފައިިވާކަން ފާހަގަ ކުރައްވަމުން ވިދާޅުވީ، ދުނިޔޭގެ ތަރައްޤީވަމުން އަންނަ ބައެއް ޤައުމުތަކުގައި އާބާދީގެ ދެ އިންސައްތައަށް ވެސް ވެކްސިން ދެވިފައިނުވާ ކަމަށެވެ. އަދި ރާއްޖެ ފަދަ ވަސީލަތް މަދު ޤައުމަކަށް މިފަދަ ބޮޑު ކާމިޔާބީއެއް ހޯދުނީ، ގިނަ މަސައްކަތްތަކެއްކޮށްގެންކަން ޝާހިދު ފާހަގަ ކުރެއްވިއެވެ.

ޝާހިދުގެ ވާހަކަފުޅުގައި އިދިކޮޅުން ހިންގަމުން އަންނަ "އިންޑިއާ އައުޓް" ކެންޕެއިނަަށް ވަނީ ވަރަށް ބޮޑަށް ފާޑު ވިދާޅުވެފައެެވެ. މިގޮތުން ވިދާޅުވީ، އެއީ އިދިކޮޅުން ރައްޔިތުންނަށް ޓަކައި ދައްކާ ވާހަކައެއް ނޫން ކަމަށާއި އަމިއްލަ ނަފްސަށް ޓަކައި ދައްކާ ވާހަކައެއް ކަމަށެވެ. އަދި އިންޑިއާއަކީ އަބަދުވެސް އެހީއަށް އެދި ގޮވައިލާ ހިނދަކު އެހީގެ އަތް ދިއްކޮށްލާ ޤައުމެއްކަމަށް ޝާހިދު ފާހަގަ ކުރެއްވިއެވެ.

"އަޅުގަނޑުމެންގެ ބޭސްފަރުވާއަށް ބޭނުންވާ މީހުންނަށް ބޭރަށް ނުދެވި އެއްވެސް ކަމަކަށް ރާއްޖެއިން ބޭރަށް ނުފުރި، ބަންދުވެފައި އޮތް ދަނޑިވަޅެއް އައީމަ. އަޅުގަނޑުމެންގެ ގާތް، އެކުވެރި، އަވައްޓެރި އިންޑިއާ އަޅުގަނޑުމެންނަށް ދޮރު ހުޅުވައިލަދިން." ކޮވިޑް-19އާ އެކު ދުނިޔެ ބަންދުކޮށްފައި އޮއްވާ އިންޑިއާއިން ރާއްޖެއަށް ބޭސް ފަރުވާ ކުރުމުގެ ފުރުސަތު ހުޅުވައިލަދިން ކަމަށް ވިދާޅުވަމުން ޝާހިދު ވިދާޅުވިއެވެ.

ޝާހިދު އިތުރަށް ވިދާޅުވީ، އިދިކޮޅުން "އިންޑިއާ އައުޓް" ކެންޕެއިން ހިންގަނީ، އެ މީހުންނަށް ބޭސް ފަރުވާއަށް ތުރުކީއަށް، ސިންގަޕޫރަށް، ބެންކޮކަށް ފަދަ ޤައުމުތަކަށް ވަޑައިގެންނެވޭތީ ކަމަށެވެ. ނަމަވެސް އާއްމު ދިވެހި ރައްޔިތުން ބޭސްފަރުވާއަށް ވެސް ބަރޯސާވާން ޖެހެނީ އިންޑިއާއަށްކަމަށް ޝާހިދު ވިދާޅުވިއެވެ.

މީގެ އިތުރުން ޝާހިދު ވަނީ ޕީޕީއެމްގެ އެއްފަސް ކުރުމުގެ ސިޔާސަތަށް ވެސް ވަރަށް ބޮޑަށް ފާޑު ވިދާޅުވެފައެވެ.

"ޕީޕީއެމްގެ މުޅި ވިސްނުމަކީ، މި ރަށްތައް ފަޅުކޮށްލުން. އެހެން ނޫން ނަމަ ތަރައްޤީގެ ކޮންމެވެސް މަޝްރޫއެއް މި ރައްތަކުގައި ހިންގާނެ ނޫންތޯ. އެމީހުންގެ ވިސްނުމަކީ ރަށްތައް ފަޅުކޮށް ބޭރުގެ ރަށްތަކަށް ވިއްކާލުން"

ޝާހިދު ވިދާޅުވީ، އެމްޑީޕީގެ ސިޔާސަތަކީ ރަށްތަކުގެ މީހުން، އެމީހުންގެ ވަޒަނުގައި ތިބެ ޤަދަރުވެރި ދިއިއުޅުމެއް އުޅެވޭނެ މާހަލުއެއް ޤާއިމް ކޮށްދިނުން ކަމަށެވެ. ނަމަވެސް އިދިކޮޅުން ބޭނުން ވަނީ ހުރިހާ އެންމެން މާލެ ގެންގޮސް ތޮއްޖައްސަން ކަމަށް ޝާހިދު ވިދާޅުވިއެވެ.