އަލީ ވަހީދު ހައްޔަރު ކުރުމުގެ އަމުރު އިނގިރޭސި ބަހުން ހޯދަން އެދުނު ވާހަކައަކީ ދޮގެއް!
މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތު އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ހޯދަން އިންޓަޕޯލް މެދުވެރިކޮށް ރެޑް ނޯޓިސް ނެރެގެން އޭނާ ހައްޔަރު ކުރަން ނެރުނު އަމުރު އިނގިރޭސިބަހުން ހޯދަން ކްރިމިނަލް ކޯޓުގައި އެދުނު ކަމަށް ފުލުހުން ވިދާޅުވި ނަމަވެސް، އެކަމަށް ފުލުހުން އެދިފައި ނުވާ ކަމަށް ކްރިމިނަލް ކޯޓުން ބުނެފިއެވެ.
ޖިންސީ ގޯނާގެ ހަތް ދައުވާއެއް އުފުލައިފައިވާ އަލީ ވަހީދު ވަނީ، އޭނާގެ މައްޗަށް ދައުވާ އުފުލި ފަހުން އިނގިރޭސިވިލާތަށް ވަޑައިގެންފައެވެ. އެކަމުގެ ސަބަބުން އޭނާގެ ޝަރީއަތް ވަނީ ކުރިއަށް ނުގެންދެވި ހުއްޓިފައެވެ.
މިދިޔަ އަހަރުގެ ނޮވެމްބަރު މަހުގެ 28ވަނަ ދުވަހު ކްރިމިނަލް ކޯޓުގައި އަލީ ވަހީދުގެ ޝަރީއަތުގެ އަޑުއެހުމެއް ބޭއްވުމުން، އެ ކޯޓުން ވަނީ އޭނާ ތިން ދުވަހުގެ ތެރޭގައި ކޯޓަށް ހާޒިރު ކުރުމަށް އޭނާގެ ބަދަލުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީއަށް އަންގައިފައެވެ. އަދި އޭގެ އަނެއް ދުވަހު އަލީ ވަހީދު ހައްޔަރުކޮށްގެން އެ ކޯޓަށް ހާޒިރު ކުރުމުގެ އަމުރެއް ވެސް ނެރުނެވެ.
އެ އަމުރާ ގުޅިގެން ފުލުހުން މަސައްކަތް ކުރީ އިންޓަޕޯލް މެދުވެރިކޮށް ރެޑް ނޯޓިސް ނެރެގެން އަލީ ވަހީދު ހައްޔަރު ކުރެވޭތޯއެވެ. ނަމަވެސް، އޭގެ ފަހުން ދޮޅު މަސް ފާއިތުވި އިރު ވެސް ރެޑް ނޯޓިސް ނެރެފައެއް ނުވެއެވެ.
ރެޑް ނޯޓިސް ނުނެރެވުނު ސަބަބާ ގުޅިގެން ފުލުހުން މިއަދު ވިދާޅުވީ އިންޓަޕޯލުން ބޭނުންވާ މައުލޫމާތުތަކާ އެކު އިނގިރޭސި ބަހުން އަމުރެއް ނެރުމަށް މިދިޔަ މަހު ސިޓީއަކުން ކްރިމިނަލް ކޯޓުގައި އެދިލައްވައިފައިވާނެ ކަމަށެވެ. އަދި މިދިޔަ ހަފްތާގައި ވެސް އިތުރު ސިޓީއެއް ފޮނުއްވައިފައިވާނެ ކަމަށް ފުލުހުން ވިދާޅުވިއެވެ.
އެހެން ނަމަވެސް، ކްރިމިނަލް ކޯޓުގެ މީޑިއާ އޮފިޝަލު އަމާން މުހައްމަދު އޮންލައިން ނޫސް 'ދައުރު'އަށް މައުލޫމާތު ދެއްވަމުން ވިދާޅުވީ، އަލީ ވަހީދު ހައްޔަރު ކުރަން ނެރުނު އަމުރު އިނގިރޭސި ބަހުން ނެރެދޭން ފުލުހުން ފޮނުވި ސިޓީއެއްގައި އެދިފައި ނުވާ ކަމަށެވެ.
