ސައްހަ ނޫން ފޯމް ވައްދައިގެން ޕީޕީއެމްގެ މެމްބަރުން ބަދަލުކުރުމަކީ އީސީން ހިންގާ ބޮޑު ޖަރީމާއެއް: ޝިޔާމް
ސައްހަ ނޫން ފޯމް ބޭނުންކޮށްގެން ބޭކާރު ޕާޓީތަކަށް ޕީޕީއެމްގެ މެމްބަރުން ބަދަލުކުރުމަކީ އިލެކްޝަންސް ކޮމިޝަން (އީސީ)އިން ހިންގާ ބޮޑު ޖަރީމާއެއް ކަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިފަދައިން ވިދާޅުވީ އީސީއަށް ސައްހަ ނޫން ފޯމްތަކެއް ވައްދަން އުޅެނިކޮށް އެކަން ހުއްޓުވަން މަސައްކަތް ކުރި މުވައްޒަފަކު ވަޒީފާއިން ވަކި ކުރި ކަމަށް ބުނެ މީސް މީޑިއާގައި ދެކެވޭ ވާހަކަތަކަކާ ގުޅިގެންނެވެ.
ޝިޔާމް ވިދާޅުވީ އެ މައްސަލައިގައި އީސީ ޖަވާބުދާރީ ކުރުވާނެ ކަމަށާއި ތަކުރާރުކޮށް އެފަދަ މައްސަލަތަކުގެ ކަންބޮޑުވުން ފާޅުކުރަމުންދާ ކަމަށެވެ.
“އީސީ ޖަވާބުދާރީ ކުރުވާނަން މިކަމުގައި. ތަކުރާރުކޮށް މިކަމުގެ ކަންބޮޑުވުން މިދަނީ ހިއްސާ ކުރަމުން. ސައްހަ ނޫން ފޯމް ބޭނުންކޮށްގެން ބޭކާރު ޕާޓީތަކަށް ޕީޕީއެމްގެ މެމްބަރުން ބަދަލުކުރުމަކީ އީސީން ހިންގާ ބޮޑު ޖަރީމާއެއް” ޝިޔާމް ވިދާޅުވިއެވެ.
މި މައްސަލާގައި ވަޒީފާއިން ވަކި ކުރި މުވައްޒަފަކީ ޕްރޮބޭޝަންގައި ހުރި މުވައްޒަފެކެވެ. އޭނާ ރިޕޯޓުކޮށްފައި ވަނީ ޕީޕީއެމްގެ ކުރީގެ މަޖިލިސް މެމްބަރެއްގެ ނަމުގައި އެހެން ސިޔާސީ ޕާޓީއަކުން ލައިފައިވާ ފޯމެއް ކަމަށާއި އޭނާ އަކީ ޕްރޮބޭޝަން މުއްދަތުގައި ބަރާބަރަށް މަސައްކަތް ކުރަމުން ދިޔަ، އަދި ވަޒީފާއަށް ގަޑިއަށް ހާޒިރުވަމުން ދިޔަ މުވައްޒަފެއް ކަމަށް މި މައްސަލައާ ގުޅިގެން ވާހަކަ ދެއްކި މީހަކު ބުނެފައިވެއެވެ.
Ads by STO
