ރައީސް ނަޝީދު ވިދާޅުވަނީ ސަރުކާރާއި ރައީސް ޞާލިޙް ވެސް ކާމިޔާބުކަމަށް
- ރައީސް ނަޝީދު ސްރީލަންކާގެ ނޫހެއްކަމަށްވާ “ޑެއިލީ މިރާރ” އަށް އިންޓަވިއު ދެއްވަމުން ވިދާޅުވީ ރާއްޖޭގައި މިހާރު އޮތް ސަރުކާރަކީ އެމްޑީޕީގެ ސަރުކާރެއްކަމަށާއި މި ސަރުކާރުން ވެފައިވާ ގިނަ ވައުދުތަކެއް މިހާރު ފުއްދާފައިވާ ކަމަށް
ރާއްޖޭގައި މިހާރު ވެރިކަން ކުރަމުން އަންނަ މޯލްޑިވިއަން ނޭޝަނަލް ޑިމޮކްރެޓިކް ޕާޓީ (އެމްޑީޕީ)ގެ ސަރުކާރާއި، ރައީސް އިބްރާހިމް މުހައްމަދު ސާލިހް ވެސް ކާމިޔާބުކަމުގައި ރާއްޖޭގެ ކުރީގެ ރައީސް އަދި ރައްގިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ސްރީލަންކާގެ ނޫހެއް ކަމަށްވާ “ޑެއިލީ މިރަރ”އަށް ރައީސް ނަޝީދު ދެއްވި އިންޓަވިއުއެއްގައި ވިދާޅުވީ ރާއްޖޭގައި މިހާރު އޮތް ސަރުކާރަކީ އެމްޑީޕީގެ ސަރުކާރެއް ކަމަށާއި މި ސަރުކާރުން ވެފައިވާ ގިނަ ވައުދުތަކެއް މިހާރު ފުއްދައިފައިވާ ކަމަށެވެ.
އަދި ސަރުކާރުގެ މަސައްކަތްތައް ވަރަށް ފުރިހަމަކޮށް ކުރިއަށްދާ ކަމަށް ވެސް ރައީސް ނަޝީދު ވިދާޅުވިއެވެ.
އެ މަނިކުފާނު އިތުރަށް ވިދާޅުވީ ސަރުކާރާ ހަވާލުވުމުގެ ކުރިން ރައީސް އިބްރާހިމް މުހައްމަދު ސާލިހް ވެވަޑައިގެންފައިވާ ވައުދުތަކުގައި އެމަނިކުފާނު ނަމޫނާ ދައްކަވައިފައިވާ ކަމަށެވެ.
ރައީސް ނަޝީދު ވަނީ ސަރުކާރުން ވެފައިވާ ވައުދުތަކުގެ ބޮޑު ބައެއް ނިމިފައި ވީނަމަވެސް އަދި އިތުރަށް ކުރަން ޖެހޭ ވަރަށް ގިނަ ކަންކަން ހުރިކަން ވެސް ފާހަގަކުރައްވައިފައެވެ.
މީގެ އިތުރުން ރައީސް ނަޝީދު ވަނީ ރައީސް ޔާމީން އިސްވެ ހުންނަވައި ކުރިއަށް ގެންދަވާ އިންޑިއާ އައުޓް ކެމްޕެއިނަށް ފާޑު ވިދާޅުވެފައެވެ. އެމަނިކުފާނު އެ ކެމްޕެއިން ސިފަކުރައްވައިފައި ވަނީ އެއްވެސް މަގްސަދެއް އަދި އަމާޒެއް ވެސް ނެތި ހިންގާ ކެމްޕެއިނެއްގެ ގޮތުގައެވެ.
