ސަރުކާރުގެ ދީނީ ސިޔާސަތު ކަމުނުދާ ސަބަބުތައް ޖަމީލު ހާމަ ކުރައްވައިފި

ރައީސް އިބްރާހީމް މުހައްމަދު ސާލިހުގެ ސަރުކާރުގެ ދީނީ ސިޔާސަތަށް ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު ވަރަށް ބޮޑަށް ފާޑުވިދާޅުވެއްޖެއެވެ.

Ads by MWSC

ޕްރޮގްރެސިވް ކޮންގްރެސް ކޯލިޝަނުގެ އެޑްވައިޒަރުގެ މަގާމުގައި ހުންނެވި ޖަމީލު މިއަދު ކުރެއްވި ޓްވީޓެއްގައި ވިދާޅުވީ އިސްލާމް ދީނަށް ފުރައްސާރަ ކުރާ މީހުންނަށް ހިމާޔަތް ދިނުމަކީ ސަރުކާރުގެ ދީނީ ސިޔާސަތުގައި ފާހަގަކޮށްލެވޭ ކަމެއް ކަމަށެވެ.

އެ މަނިކުފާނު ވަނީ، މިސްކިތްތައް ނަޖިސްކޮށް، މަސްތުވާތަކެތި ބޭނުން ކުރާ މީހުން އެތަންތަން އެމީހުންގެ އައްޑާއަކަށް ހަދައިފައިވާތީ ކަންބޮޑުވުން ފާޅުކުރައްވައިފައެވެ. އަދި ކީރިތި ޤުރުއާން އުނގަންނައި ނުދިނުމަށް ޓަކައި އެކި އުުކުޅުތައް ވެސް ސަރުކާރުން ބޭނުން ކުރަމުން އަންނަ ކަމަށާއި، "ހޯމްސްޓޭ ޓޫރިޒަމް"ގެ ނަމުގައި ހުޅަނގުގެ ހުރިހާ ސަގާފަތެއް ދިވެހި މުސްލިމު އާއިލާތަކުގެ ތެރެއަށް ވައްދަމުން އަންނަ ކަމަށް ވެސް ވިދާޅުވިއެވެ.

ޖަމީލުގެ ޓްވީޓުގައި، މޫނު ބުރުގާ އަޅާ މީހުންނާ މެދު އެއްވެސް ތަފާތު ކުރުމެއް ނުގެންގުޅޭނެ ކަމަށް ބުނެ، ސަރުކާރުން އެފަދަ މީހުންނާ މެދު ތަފާތު ކުރުން ގެންގުޅޭތީ އެކަމަށް ވެސް ފާޑު ވިދާޅުވިއެވެ.

މީގެ އިތުރުން، އަންނަ މަހުގެ 05 ވަނަ ދުވަހު ބާއްވާ، ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި ސަރުކާރު ކޯލިޝަނުގައި ހިމެނޭ އަދާލަތު ޕާޓީން، އެމްޑީޕީގެ ކެނޑިޑޭޓް، މުހައްމަދު ރާޝިދަށް ތާއީދު ކުރަން ނިންމި ނިންމުމަށް ފާޑު ވިދާޅުވެ، ކުޑަ އަގެއްގައި ދީން ނީލަން ކިޔާ މީހުންނާ މެދު ސަމާލުވާން ޖަމީލު އެދިވަޑައިގަތެވެ. އެމަނިކުފާނު އިލްތިމާސް ކުރެއްވީ އަދާލަތު ޕާޓީގެ މެމްބަރުން އެ ޕާޓީ ދޫކޮށްލުމަށެވެ.