މަޖިލީހަށް ހާޒިރުނުވެ، ކެމްޕެއިނަށް ވަޑައިގަންނަވާތީ ޝިދާތާގެ ފާޑުކިޔުން ގާސިމަށް

ށ.ކޮމަންޑޫ ދާއިރާގެ ބައިއިލެކްޝަންގައި ވާދަ ކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދުއަށް ކެމްޕެއިން ކޮށްދެއްވަން ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު، އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމްވަޑައިގަންނަވާތީ، އެމްއެންޕީގެ މަތި އުތުރު ރީޖަންގެ ނައިބު ރައީސް ޝިދާތާ ޝަރީފު ވަަރަށް ބޮޑަށް ފާޑުވިދާޅުވެއްޖެއެވެ.

Ads by Sosun Fihaara

ޝިދާތާ މިއަދު ކުރެއްވި ޓްވީޓެއްގައި ގާސިމްގެ އިހްލާސްތެރިކަމާ މެދު ސުވާލު އުފެއްދެވިއެވެ. އެގޮތުން ގާސިމަކީ ކޮވިޑަށް ހައިރިސްކް ބޭފުޅަކަށް ވާތީ ކަމަށް ބުނެ، ދެއަަހަރު މަޖިލީހުގެ ޖަލްސާތަކުގައި ބައިވެރިވެވަޑައިނުގަންނަވާ ހުންނެވުމަށް ފަހު، ކެމްޕެއިނަށް ވަޑައިގަންނަވާކަން ޝިދާތާ ފާހަގަކުރެއްވިއެވެ.

އޭނާ ވަނީ ގާސިމް ދެއަހަރު ދުވަހަށް ވުރެ ގިނަ ދުވަހު މަޖިލީހަށް ހާޒިރު ނުވެ ހުންނެވިއިރު، މުސާރަ ވެސް ނެންގެވިކަން ފާހަގަ ކުރައްވައިފައެވެ.

"ކޮވިޑްގެ ހާލަތު އެންމެ ގޯސްވި ދަނޑިވަޅު ބަލައި މިހާރު ކެމްޕެއިނަށް. މަނިކުފާނަށް ރައްޔިތުންނަށް އިހްލާސްތެރިވެވޭނީ ތިވަރަށް." ޝިދާތާ ވިދާޅުވިއެވެ.

އަންނަ މަހުގެ 05ވަނަ ދުވަހު ބާއްވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަކުރައްވާ ކެނޑިޑޭޓަށް ކެމްޕެއިނަށް ކުރެއްވުމަށް ގާސިމް ކޮމަންޑޫއަށް ވަޑައިގަންނަވާ ގޮތަށް ވަނީ ހަމަޖެހިފައެވެ.

އެނގިފައިވާ ގޮތުގައި ގާސިމް އެރަށަށް ވަޑައިގަންނަވަނީ އަންގާރަ ދުވަހުއެވެ. ޖޭޕީގެ އިތުރުން ސަރުކާރު ކޯލިޝަނުގައި ހިމެނޭ އަދާލަތު ޕާޓީން ވެސް ވަނީ މިފަހަރުގެ އިންތިހާބުގައި އެމްޑީޕީއަށް ތާއީދު ކުރުމަށް ނިންމައިފައެވެ.ނަމަވެސް އެ ޕާޓީގެ ވަކިވަކި މެމްބަރުން ދަނީ އެމްޑީޕީގެ ކެނޑިޑޭޓާ ދެކޮޅު ޝުޢޫރުފާޅު ކުރައްވަމުންނެވެ، އޭގެ ތެރޭގައި އެ ޕާޓީގެ ޢިލްމުވެރީންގެ މަޖިލީހުގެ މެމްބަރު ޝައިޚް ޢަލީ ޒައިދު ވެސް ހިމެނިވަޑައިގަންނަވައެވެ.