އަސާސީ ބޭސްތަކުގެ އަގު ކޮންޓްރޯލު ކުރުން މާރޗް މަހަށް ފަސްކޮށްފި
އަސާސީ ބޭހުގެ ލިސްޓުގައި ހިމެނޭ ބޭސްތަކުގެ އަގު ކޮންޓްރޯލު ކުރުން މާރޗް މަހަށް ފަސްކޮށްފިއެވެ.
އެފަދަ ބޭހުގެ އަގު ކޮންޓްރޯލު ކުރުމަށް ނެރެފައިވާ މެކްސިމަމް ރީޓެއިލް ޕްރައިސް (އެމް.އާރް.ޕީ) ކަނޑައެޅުމާއި ތަންފީޒު ކުރުމުގެ ގަވާއިދަށް ވަނީ އިސްލާހެއް ގެނެސްފައެވެ. އެ އިސްލާހުގައި ބުނެފައި ވަނީ، އަސާސީ ބޭސްތައް ކޮންޓްރޯލް އަގުގައި ވިއްކަން ޖެހޭނީ މި އަހަރުގެ މާރޗް މަހުން ފެށިގެން ކަމަށެވެ.
އަސާސީ ބޭހުގެ ލިސްޓުގައި ހިމެނޭ ބޭހުގެ އެމްއާރުޕީ ކަނޑައެޅުމަށް ފަހު، ބޭހުގެ އަގުތައް ހިމެނޭ ލިސްޓު، ދިވެހި ސަރުކާރުގެ ގެޒެޓުގައި މާރޗް 1ވަނަ ދުވަހުން ފެށިގެން ޝާއިއު ކުރަންޖެހޭ ކަމަށް ވެސް އެ ގަވާއިދުގައި ބުނެފައިވެއެވެ. އެމްއާރުޕީ ކަނޑައެޅުމުގައި ބޭސް ގަންނަ އަގަށް ބޮޑުވެގެން ލެވޭނީ %100ގެ މާކްއަޕެކެވެ.
އިއުލާނު ކޮށްފައިވާ މި ގަވާއިދާ ހިލާފަށް ބޭސް ވިއްކާ ފަރާތްތަށް ބޮޑެތި އަދަދުތަކުން ޖޫރިމަނާ ކުރެވޭނެ ކަމަށް ވެސް އެ ގަވާއިދުގައި ބުނެފައިވެއެވެ.
