މެމްބަރުންގެ ވީއައިޕީއަށް ދައުލަތުން 1.6 މިލިއަން ރުފިޔާ، އެންމެ ބޮޑު ހަރަދެއް ނާޒިމަށް
2019 ވަނަ އަހަރުން ފެށިގެން 2021 ވަނަ އަހަރާއި ހަމައަށް ތިން އަހަރު ދުވަހުގެ މުއްދަތުގެ ތެރޭގައި ރައްޔިތުންގެ މަޖިލިސް މެމްބަރުންނަށް ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖުން ފޯރުކޮށްދިން ހިދުމަތްތަކުގެ ހަރަދަށް ޖުމްލަ 1.6 މިލިއަން ރުފިޔާ އަރާކަމަށް ތަފާސް ހިސާބުތަކުން ދައްކައިފިއެވެ.
މަޖިލިސް މެމްބަރުންނާއި އެމެމްބަރުންގެ އާއިލާތަކުގެ އިތުރުން މެމްބަރުން އެދިލައްވާ ރަހުމަތްތެރިންނަށް ވީއައިޕީގެ ހިދުމަތް ފޯރުކޮށްދެނީ ދައުލަތުގެ ހަރަދުގައެވެ. މިހަރަދުތަކުގެ ތަފްސީލު ފޯރުކޮށްދިނުމަށް އައިމަން ލަތީފު ކިޔާ އަމިއްލަ ފަރުދަކު ރައްޔިތުންގެ މަޖިލީހުގައި އެދުމުން އެމައުލޫމާތުތައް ވަނީ ފޯރުކޮށްދީފައެވެ.
ތިން އަހަރުގެ ހަރަދުތައް ދައްކާ ގޮތުން އެންމެ ބޮޑު ހޭދައެއް ކޮށްފައިވަނީ ދަނގެތީ ދާއިރާގެ މެމްބަރު މުހައްމަދު ނާޒިމް (ކާނަލް ނާޒިމް) ގެ ވީއައިޕީ ހިދުމަތްތަކަށެވެ. އެގޮތުން ޖުމްލަ 112 ދަތުރަކަށް މިތިން އަހަރުގެ ތެރޭގައި ނާޒިމާއި އޭނާގެ އާއިލާގެ އިތުރުން ރަހުމަތްތެރިންނަށް 103،622 ރުފިޔާ ވަނީ ހަރަދުކޮށްފައެވެ.
ދެން އެންމެ ބޮޑު ހަރަދެއް ކޮށްފައިވަނީ ގުރައިދޫ ދާއިރާގެ މެމްބަރު މުހައްމަދު ޣައްސާންގެ ވީއައިޕީ ހިދުމަތްތަކަށެވެ. ޣައްސާންއަށް ފޯރުކޮށްދިން ވީއައިޕީ ހިދުމަތްތަކަށް 87،894 ރުފިޔާ ހޭދަވެއެވެ. އެއީ މުޅި ޖުމްލަ 95 ދަތުރަކަށެވެ.
ކާށިދޫ ދާއިރާގެ މެމްބަރު އަބްދުﷲ ޖާބިރުގެ 93 ދަތުރަކަށް 86،043 ރުފިޔާ ވަނީ ހަރަދުކޮށްފައެވެ. މީގެ އިތުރުން ވިލިނގިލީ ދާއިރާގެ މެމްބަރު ސައުދު ހުސައިންއަށް ދިން ވީއައިޕީ ހިދުމަތްތަކަށްވެސް ދައުލަތުން ވަނީ 74،016 ރުފިޔާ ހޭދަކޮށްފައެވެ.
މިމައުލޫމާތުތައް ދައްކާ ގޮތުން މެމްބަރުންނަށް ވީއައިޕީ ހިދުމަތް ފޯރުކޮށްދިނުމަށް އެންމެ ބޮޑު ހޭދައެއް ކޮށްފައިވަނީ 2019 ވަނަ އަހަރުއެވެ. އެއަހަރު އެކަނިވެސް ދައުލަތުން ވަނީ 767،916 ރުފިޔާ ހޭދަކޮށްފައެވެ. 2020 ވަނަ އަހަރު މިކަމަށް ދައުލަތުން ހޭދަކުރީ 421،891 ރުފިޔާއެވެ. އަދި 2021 ވަނަ އަހަރު 420،040 ރުފިޔާއެވެ. މިއާއެކު ތިން އަހަރު ތެރޭގައި މެމްބަރުންގެ ވީއައިޕީ ހިދުމަތްތަކަށް 1.6 މިލިއަން ރުފިޔާ ހޭދަކޮށްފައިވާކަމަށް މައުލޫމާތުތައް ދައްކައެވެ.
މަޖިލިސް މެމްބަރުންގެ ތެރެއިން 8 މެމްބަރަކަށް އެއްވެސް ހޭދައެއް ދައުލަތުން ވީއައިޕީ ހިދުމަތް ދިނުމަށް ކޮށްފައެއް ނުވެއެވެ. އެއީ ހިތަދޫ މެދު ދާއިރާގެ މެމްބަރު އަހުމަދު ރަޝީދާއި، ގައްދޫ ދާއިރާގެ މެމްބަރު އަހުމަދު ޒާހިރާއި، ވިލުފުށީ ދާއިރާގެ މެމްބަރު ހަސަން އަފީފާއި، ނިލަންދޫ ދާއިރާގެ މެމްބަރު އަބްދުލް މުހުސިން ހަމީދާއި ވިލިމާލެ ދާއިރާގެ މެމްބަރު އަހުމަދު އުޝާމާއި މާފަންނު މެދު ދާއިރާގެ މެމްބަރު އިބްރާހިމް ރަޝީދުގެ އިތުރުން ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒުއެވެ.
މީގެ އިތުރުން މައްޗަންގޮޅި މެދު ދާއިރާގެ މެމްބަރު އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ވީއައިޕީ ހިދުމަތަށް ދައުލަތުން ހަރަދު ނަންގަވާފައެއް ނުވެއެވެ. ބެލެވޭ ގޮތުގައި ކުރީގެ ރައީސްގެ ހައިސިއްހަތުން ރައީސް ނަޝީދަށް ލިބިލައްވާ އިނާޔަތްތަކުގެ ތެރޭގައި ވީއައިޕީ ހިދުމަތަށް ހަރަދުތައް ހަމަޖައްސަވައިދެއްވާތީ އެހަރަދު މަޖިލިސް މެދުވެރިކޮށް ނަންގަވާފައި ނުވަނީއެވެ.
