މިފްކޯއަށް މަސް ގަންނަ އަގު ބޮޑު ކުރަނީ
އަންނަ މާރޗް މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑު ކުރުމަށް ސަރުކާރުން ނިންމައިފައި ވާކަން ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ހާމަކުރައްވައިފިއެވެ.
ރައީސް ޞާލިޙް މިކަން ހާމަ ކުރައްވައިފައި ވަނީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުންނެވެ.
އެމަނިކުފާނު ވިދާޅުވީ ބާނާ މަހަށް ލަސްނުކޮށް ފައިސާ ލިބޭނެކަމުގެ ޔަގީންކަން މަސްވެރިންނަށް މިހާރު އޮންނާނެ ކަމަށެވެ. އަދި ދުނިޔޭގެ ބާޒާރުގައި ބޮޑު އަގު ލިބޭ ނަމަ މިފްކޯއަށް ގަންނަ މަހުގެ އަގު ބޮޑުވާނެކަމަށެވެ.
ރައީސް ޞާލިޙު ވިދާޅުވީ އެސްޓީއޯގެ ދަށުން މިފްކޯ ވަކިކޮށް، އަމިއްލަ ފައިމައްޗަށް ތެދުވެގެން ހިންގޭނެ ކުންފުންޏަކަށް މިއަހަރުގެ މެދުތެރޭގައި މިފްކޯ ބަދަލުކުރެވޭނެ ކަމަށާއި މަސްވެރިންނަށް މަހުން ލިބޭ އާމްދަނީގައި ހޫނު ކަމެއް ހުންނަނީ ކިރާ މަހުގާ ފިނިކަމެއް ހުރެގެން ކަމަށް ރައީސް ވިދާޅުވިއެވެ. އެގޮތުން 118 ދޯންޏެއްގައި މަސް ފިނިކުރާ ނިޒާމް ހަރުކުރުމަށް މި އަހަރު ތެރޭ 59 މިލިއަން ރުފިޔާގެ ލުއި ލޯން ދޫކުރަން ފަށާނެކަމަށް ރައީސް ވިދާޅުވިއެވެ.
"މަސްވެރިންނަށް މަހުން ލިބޭ އާމްދަނީގައި ހޫނު ކަމެއް ހުންނަނީ ކިރާ މަހުގާ ފިނިކަމެއް ހުރެގެން، އެގޮތުން 118 ދޯންޏެއްގައި މަސް ފިނިކުރާ ނިޒާމް ހަރުކުރުމަށް މިއަހަރު ތެރޭ 59 މިލިއަން ރުފިޔާގެ ލުއި ލޯން ދޫކުރަން ފަށާނެ" ރައީސް ވިދާޅުވިއެވެ.
ފާއިތުވެދިޔަ 15 އަހަރު ދުވަހުގެ ތެރޭގައި އެންމެ ގިނަ އަދަދަކަށް މިފްކޯއަށް މަސް ކިރުވައިފައި ވަނީ ނިމިދިޔަ އަހަރުގައި ކަމަށް ވެސް ރައީސް ވިދާޅުވިއެވެ.
