އެމްޑީޕީން އަންނަނީ އިންތިހާބަށް ނުފޫޒު ފޯރުވުމަށް ކުރެވެން ހުރި ހުރިހާ ކަމެއް ކުރަަމުން: އުޝާމް
ށ.ކޮމަންޑޫ ދާއިރާގެ ބައި-އިލެކްޝަނަށް ނުފޫޒު ފޯރުވުމަށް ޓަކައި ކުރެވެން ހުރި ހުރިހާ ކަމެއް ވެރިކަން ކުރާ މައި ޕާޓީ އެމްޑީޕީން ކުރަމުން ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވެފައި ވަނީ އޭނާ މިއަދު ކުރެއްވި ޓްވީޓެއްގައެވެ.
މި އިންތިހާބުގެ ވޯޓުލުން، ށ.ފޯކައިދޫގައި ކުރިއަށްދާއިރު، އެރަށުގައި ހުންނަ ވޯޓުލާ މަރުކަޒު ކައިރީގައި، އެމްޑީޕީގެ ކެނޑިޑޭޓް، މުހައްމަދު ރާޝިދު އުޅުއްވާ ވީޑިއޯއެއް ހިއްސާ ކުރައްވައި އުޝާމް ވިދާޅުވީ، ރާޝިދު އަދިވެސް ހުންނެވީ ވޯޓުލާ މަރުކަޒު ކައިރީގައި ކަމަށާއި، އީސީއަށް މި މައްސަލަ ހުށަހަޅައިގެން ވެސް ހައްލެއް ނުލިބުނު ކަމަށެވެ.
"އެމްޑީޕީން އަންނަނީ، ގާނޫނާ ހިލާފަށް، ވޯޓަށް ނުފޫޒު ފޯރުވުމަށް ކުރެވެން ހުރި ހުރިހާ ކަމެއް ކުރަމުން." އުޝާމްގެ ޓްވީޓުގައި ލިޔުއްވާފައިވެއެވެ. އޭނާ ވިދާޅުވީ އީސީއަށް ހުށަހަޅައިގެން އެއްވެސް މައްސަލައެއްގެ ހައްލު ނުލިބޭ ކަމަށެވެ.
އެމްޑީޕީން މިއަދުގެ އިންތިހާބަށް ނުފޫޒު ފޯރުވަމުން އަންނަ ކަމަށް އެމްއެންޕީން ތުހުމަތު ކުރިއިރު، މި ތުހުމަތު ޕީޕީއެމްއިން ވެސް ވަނީ ކޮށްފައެވެ.
ވާދަވެރިކަން ބޮޑުވެފައިވާ ކޮމަންޑޫ ދާއިރާގެ މިއަދު ކުރިޔަށް ދާ ބައިއިލެކްޝަންގައި 7 ވޯޓް ފޮއްޓެއް އިލެކްޝަންސް ކޮމިޝަނުން ވަނީ ބަހައްޓައިފައެވެ.
ވޯޓު ފޮށި ބަހައްޓާފައި ވަނީ ށ. ފޯކައިދޫ ސްކޫލް - 2 ފޮށި، ށ. މަރޮށި އިޖުތިމާއީ މަރުކަޒު - 1 ފޮށި، ށ. އަތޮޅު ތައުލީމީ މަރުކަޒު (ކޮމަންޑޫ) - 1 ފޮށި، ށ. ކޮމަންޑޫ ޕްރީސްކޫލް - 1 ފޮށި އަދި އިސްކަންދަރު ސްކޫލް - 2 ފޮށްޓެވެ.
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓުލުމުގެ ހައްޤު ލިބިގެންވެއެވެ. އެއީ ކޮމަންޑޫގެ 1،405 މީހުންނާއި، ފޯކައިދޫގެ 1،201 މީހުންނާއި، މަރޮށީގެ 703 މީހުންނެވެ.
ބަޢާވާތް ކުރެވިދާނެ އެހެންކަމެއް ނުކުރެވޭނެ