އިންތިހާބާ ދިމާކޮށް މަޝްރޫއުތައް ހިންގުމަކީ އާދަކާދަ، ހުއްޓުވޭނެ ގޮތެއް ނޯވޭ: ފުއާދު
އިންތިހާބުތަކާ ދިމާކޮށް، އެއިރެއްގައި އޮންނަ ސަރުކާރަކުން މަޝްރޫއުތައް ހިންގުމަކީ އާދަކާދައިގެ ތެރެއިން ހިނގަމުން އަންނަ ކަމެއް ކަމަށާއި، އެކަންކަން ހުއްޓުވުމަށް އިލެކްޝަންސް ކޮމިޝަނަށް ކުރެވޭނެ ކަމެއް ނެތް ކަމަށް އެކޮމިޝަނުގެ ރައީސް ފުއާދު ތައުފީގު ވިދާޅުވެއްޖެއެވެ.
ށ.ކޮމަންޑޫ ދާއިރާގެ ބައި-އިލެކްޝަނާ ދިމާކޮށް ސަރުކާރުން އެ ދާއިރާގައި މަޝްރޫއުތައް ހިންގަން ފެށުމުން، އިދިކޮޅު ފަރާތްތަކުގެ ފާޑުކިޔުން ވަރަށް ބޮޑަށް އަމާޒުވިއެވެ. ދެކޮމަންޑޫ ގުޅުވައިލުމުގެ ބޮޑު މަޝްރޫއުގެ އިތުރުން، ކޮމަންޑޫގައި ފުޓްބޯޅަ ދަނޑެއް އެޅުމާއި، އެމްބިއުލާންސްއެއްް ފޮނުވުން ފަދަ ކަންކަމަކީ ސަރުކާރުން އިންތިހާބަށް ނުފޫޒު ފޯރުވުމަށް ކުރި ކަންކަމުގެ ގޮތުގައި އިދިކޮޅުން ސިފަ ކުރެއެވެ.
ޕީޕީއެމްގެ ނައިބު ރައީސް ޑރ.މުހައްމަދު މުއިއްޒު ވިދާޅުވީ، އިދިކޮޅުން ހިސާބު ޖަހައި، ބަލައިފައިވާ ކަމަށާއި، ބައި-އިލެކްޝަނަށް ސަރުކާރުން ބިލިއަނެއްހައި ރުފިޔާ ހަރަދުކުރި ކަމަށެވެ. މިއީ ކޮމަންޑޫ ދާއިރާގެ ކޮންމެ ރައްޔިތެއްގެ ބޮލަކަށް ނަމަ، ތިން ލައްކަ ރުފިޔާ ކަމަށް ވެސް އޭނާ ވިދާޅުވިއެވެ.
ސަރުކާރުން އިންތިހާބަށް ނުފޫޒު ފޯރުވުމަށް މަސައްކަތް ކުރި ކަމަށް މޯލްޑިވްސް ނެޝަނަލް ޕާޓީ(އެމްއެންޕީ)އިން ވެސް ތުހުމަތު ކުރިއިރު، ސަރުކާރު ކޯލިޝަނުގައި ހިމެނޭ މޯލްޑިވްސް ރިފޯމް މޫވްމަންޓް(އެމްއާރްއެމް)އިން ވެސް ވަނީ، އިންތިހާބާ ދިމާކޮށް ކުއްލި ގޮތަކަށް ކޮމަންޑޫ ތަަރައްގީ ކުރުމަށް ސަރުކާރުން އަވަސްވެގަތުމުން، އެކަމަށް ފާޑު ކިޔައިފައެވެ.
އިދިކޮޅުން މި މައްސަލަ އެންޓި ކޮރަޕްޝަން ކޮމިޝަން(އޭސީސީ)އަށް ވެސް ހުށަހެޅިއެވެ. ނަމަވެސް އެކޮމިޝަން މިވަގުތު އޮތީ ގާނޫނީ ހުސްކަމެއްގެ ތެރޭގައެވެ. ދެން އޮތީ އިލެކްޝަންސް ކޮމިޝަނެވެ. އިދިކޮޅު ލީޑަރު، ރައީސް ޔާމީން ވިދާޅުވީ، އޭސީސީއިން މައްސަލަ ނުބެލިޔަސް، އީސީއަށް ބެލެންވާނެ ކަމަށެވެ.
މިކަމާ ގުޅޭގޮތުން އީސީގެ ރައީސް ފުއާދު ތައުފީގާ "ދެން"އިން ސުވާލު ކުރުމުން އޭނާ ވިދާޅުވީ، ރާއްޖޭގައި އިންތިހާބާ ދިމާކޮށް މަޝްރޫއުތައް ހިންގުމަކީ ޒަމާނުއްސުރެ، އާދަ ކާދައިގެ ތެރެއިން ހިނގަމުން އަންނަ ކަމެއް ކަަމަށެވެ. އަދި މިކަން ހުއްޓުވުމަށް އީސީއަށް ކުރެވޭ ކަމެއް ނޯންނަ ކަމަށެވެ.
"2008އިން ފެށިގެން ވެސް، ރައީސް މައުމޫންގެ ދައުރުގައި ވެސް، އޭގެ ފަހުން، ރައީސް ނަޝީދު، ވަހީދު ވެސް އަދި ރައީސް ޔާމީން އިރުގައި ވެސް(މަޝްރޫއުތައް) މަޑު ޖައްސައެއް ނުލައްވާ. މިކަމާ ބެހޭގޮތުން ވާހަކަަ ދައްކައިގެން ވެސް ހުއްޓަވައެއް ނުލައްވާ." އޭނާ ވިދާޅުވިއެވެ.
ފުއާދު ވިދާޅުވީ ގިނަ ގައުމުތަކުގައި އިންތިހާބުގެ އެއް މަސް ކުރިން، މަޝްރޫއުތައް ހުއްޓާލާނެ ކަމަށެވެ. އަދި އާންމު އުސޫލުން އެކަން އޮންނަ ގޮތް ކަމަށާއި، އަލުން މަޝްރޫއުތައް ފަށާނީ، އިންތިހާބު ނިމޭތާ އެއްމަސް ދުވަސް ފަހުން ކަމަށެވެ.
"ހުރިހާ ސަރުކާރެއްގައި ވެސް މިވާހަކަ އެކި ފޯރަމްތަކުގައި ދެކެވިފައިވޭ. ސަރުކާރުން ދޭ ޖަވާބަކީ ތަރައްގީއަށް ކުރާ މަސައްކަތެއް ނުހުއްޓުވޭނެ ކަމަށް. ރައީސް ސޯލިހުއާއި ހަމައަށް އައިއިރު ވެސް މިކަން މިއޮތީ މިހެން. އެނގިވަޑައިނުގަންނަވައިގެނެއް ވެސް ނޫން އެކަން އެގޮތަށް ކުރަމުން ދަނީ." ފުއާދު ވިދާޅުވިއެވެ.
ފުއާދު އިތުރަށް ވިދާޅުވީ އިލެކްޝަންސް ކޮމިޝަނަށް ހުއްޓުވޭނީ ކެނޑިޑޭޓުން ރިޝްވަތު ބެހުން ފަދަ ކަންތައް ކަމަށާއި، ގާނޫނުގައި އޮންނަ ގޮތުން މަޝްރޫއުތައް ހުއްޓުވޭކަށް ނޯންނަ ކަމަށެވެ.
އާދަކާދައޭކިޔާފަަ އިސްތިއުފާދީީ ތިކަހަލަަ ޖާހިލުންގިނަވެގެންް މިހާރުު ދުނިޔޭގެެ ކަންތައްް އެފުއްނިފުށައެޖެހެނީވެސްް މަކަރުވެރިންނަކީި ވަރައްނުބައިި ޖައްބާރުންް އެމީހުންނައްދެދުނިޔޭގެެ ކަންތައްހުންނާނެެ ގޮތުގެވާހަކަަ ދަންނަބޭކަލުންކުރެއަހާލަބަލަަ ދުނިޔެއާާ އާޚިރަތައްް ބިރުވެތިވޭޭ