ތިލަމާލެ ބްރިޖް މަޝްރޫއު ފެށުމުގެ ކުރިން ވެސް މި ވަނީ މުސީބާތަކަށް: ސައީދު

ތިލަމާލެ ބްރިޖުގެ މަޝްރޫއު ފެށުމުގެ ކުރިން ވެސް، އެ މަޝްރޫއު ވެފައި މިވަނީ  މުސީބާތަކަށް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު، އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެއެވެ.

Ads by Hajj Corporation

މާލެ، ވިލިމާލެ، ތިލަފުށި އަދި ގުޅިފަޅު ގުޅުވައިލާން އަޅާ ތިލަމާލެ ބްރިޖު އެއްބަސްވުމަކީ ސިއްރެއް ކަމަށް ޕްލޭނިން މިނިސްޓްރީން ބުނެފައިވާ ކަމަށް "ދިޔަރެސް" ނޫހުން ވަނީ ރިޕޯޓް ކޮށްފައެވެ.

އެ ނޫހުން ރިޕޯޓް ކޮށްފައިވާ ގޮތުގައި، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "ދިޔަރެސް"އިން ބްރިޖު އެއްބަސްވުމުގެ މައުލޫމާތު ހޯދުމަށް ހުށަހެޅުމުން، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން ދެއްވި ޖަވާބުގައި ބުނެފައި ވަނީ،  ބްރިޖު އެޅުމަށް އެފްކޮންސްއާ އެކު ވެވުނު އެއްބަސްވުމުގެ ހުރިހާ މައުލޫމާތު ސިއްރު ކުރުމަށް ޝަރުތުކޮށްފައި އޮތުމުން އެ އެއްބަސްވުމާ ގުޅޭ އެއްވެސް މައުލޫމާތެއް ހާމަ ނުކުރެވޭނެ ކަމަށެވެ.

މިކަމާ ގުޅޭ ހަބަރު ޓްވިޓަރގައި ހިއްސާ ކުރައްވައި ސައީދު ވިދާޅުވީ ސިއްރު ކުރަން އޮންނަހައި ވެސް ކަމަކީ އަސްކަރީ ސިއްރު ކަމަށެވެ.

ތިލަމާލެ ބްރިޖުގެ މަޝްރޫއުއަކީ، ރައީސް އިބްރާހީމް މުހައްމަދު ޞާލިހުގެ ސަރުކާރުން ހިންގާ އުމްރާނީ ތަރައްގީގެ އެންމެ ބޮޑު މަޝްރޫއުއެވެ. މި ޕްރޮޖެކްޓް ކުރިއަށް ގެންދަނީ އިންޑިއާއިން 400 މިލިއަން ޑޮލަރުގެ ލޯނު ނަގައިގެންނެވެ.