ފިޝަރީޒް މިނިސްޓަރާއި، އޭޖީ ހިންގި ޖަރީމާ ތަހުގީގު ކުރަންޖެހޭ: ޝިޔާމް
ރާއްޖެ އެތެރެ ކުރި ދޫނިތަކެއް މަރައިލައި ފިޝަރީޒް މިނިސްޓަރު ޑރ.ހުސައިން ރަޝީދު ހަސަނާއި، ދައުލަތުގެ ބަންޑާރަ ނައިބު އިބްރާހީމް ރިއްފަތު ހިންގި ޖަރީމާ ތަހުގީގު ކުރުމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހްމަދު ޝިޔާމް ގޮވައިލައްވައިފިއެވެ.
ރާއްޖެ އެތެރެ ކުރި 130 ދޫންޏެއް، އެޓާނީ ޖެނެރަލްގެ ލަފާގެ މަތިން ކަމަށް ބުނެ، ފިޝަރީޒް މިނިސްޓްރީން ވަނީ މަރައިލައިފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، މަކުނުދޫ ދާއިރާގެ މެމްބަރު މުހައްމަދު ރާއީ ހުށަހެޅުއްވި ނެތި ދިޔުމުގެ ބިރު ހީވެފައިވާ ދިރޭ ތަކެތީގެ ބައިނަލްއަގްވާމީ ވިޔަފާރި ކުރުމުގެ ބިލަށް ބަހުސް ކުރައްވަމުން ޝިޔާމް ވިދާޅުވީ، މި ސަރުކާރަކީ އޯގާތެރިކަމުގެ ސިފަ އެއްވެސް ވަރަކަށް ނެތް ސަރުކާރެއް ކަމަށެވެ.
އިންސާނުން ހިމާޔަތް ކުރުމުގައި ފެއިލް ވެފައި ތިބި ބަޔަކަށް، ދޫނިސޫފާސޫފި ހިމާޔަތް ކުރެވޭނީ ކިހިނެއްތޯ ޝިޔާމް ސުވާލު އުފެއްދެވިއެވެ.
"200 މިލިއަން ކީއްކުރަން، 300 މިލިއަން ވެސް ޖެހިދާނެ ބަޖެޓުގައި، ދޫނިތައް ހިމާޔަތް ކުރަން. އެހެން ނަމަވެސް އެކަން ކުރުމުގެ ހެޔޮ ނިޔަތެެއް މި ސަރުކާރުގައި ނެތްކަން އަޅުގަނޑު ފާހަގަކުރަން." އޭނާ ވިދާޅުވިއެވެ.
އޭނާ ވިދާޅުވީ ފިޝަރީޒް މިނިސްޓަރާއި، އޭޖީ އެ ހިންގެވި ޖަރީމާ ތަހުގީގު ވެސް ކުރަން ޖެހޭ ކަމަށެވެ. އަދި ދޫނިތައް މެރުމާ ދެކޮޅަށް މިއަދު ހަވީރު ބާއްވާ ސުލްހަވެރި އިހްތިޖާޖުގައި ބައިވެރިވުމަށް ވެސް އޭނާ ގޮވައިލެއްވިއެވެ.
ދޫނިތައް މަރައިލި މައްސަލަ ހޫނުވީއިރު، އޭޖީ އޮފީހުން ބުނީ، ދޫނިތައް މަރައިނުލައި، އެ ގެނައި ގައުމަށް އަނބުރައިލުމުގެ ފުރުސަތު ވެސް އޮތް ކަމަށާއި، އެގޮތަށް އަމަލު ނުކޮށް، ދޫނިތައް މަރައިލީ ކަމަށެވެ. އިއްޔެ މަރައިލި ދޫނިތަކުގެ އަގު އެއް މިލިއަން ރުފިޔާއަށް އަރައެވެ.
