ގަރާޖު ސިޓީއާ ދެކޮޅު ހަދަނީ ފޭކު ގަރާޖުގެ ވިޔަފާރި ހުއްޓޭތީ: މޭޔަރު

މާލޭ ސިޓީގައި ދުއްވާ ވެހިކަލްތައް ރަޖިސްޓަރީ ކުރުމަށް ސިޓީ ކައުންސިލުން ހަމަޖައްސައިދޭން މަސައްކަތް ކުރާ ސްލޮޓުތަކާ ދެކޮޅުހަދަނީ ފޭކު ގަރާޖުގެ ވިޔަފާރި ހުއްޓުމަކަށް އަންނާނެތީ އެކަމުން ފައިދާވާ ބައެއް ކަމަށް މާލޭ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.

Ads by STELCO

އެ މަނިކުފާނު މިހެން ވިދާޅުވީ ގަރާޖު ސްލޮޓުތަކާ ގުޅޭގޮތުން ފަތުރަމުންދާ ވާހަކަތަކުގެ ޙަޤީޤަތް ހާމަކޮށްދިނުމަށް މާލޭ ސިޓީ ކައުންސިލުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ.

މޭޔަރު ވިދާޅުވީ ޕާކިންގެ ދަތިކަމަކީ މާލޭގައި ވަރަށް ބޮޑު މައްސަލައަކަށް ވާއިރު ވެހިކަލްތައް ޕާކުކުރުމަށް ބޭނުންވާ ޖާގައިގެ އިތުރުން، ވެހިކަލްތައް ރަޖިސްޓަރީ ކުރުމަށް ބޭނުންވާ ޖާގައިގެ ކަންކަމަށް ވެސް ޙައްލު ހޯދަންޖެހޭ ކަމަށެވެ.

ވެހިކަލް ރަޖިސްޓަރީ ކުރުމަށް އެ ވެހިކަލް ބާއްވާނެ ގަރާޖެއް ޓްރާންސްޕޯޓް މިނިސްޓްރީއަށް ދައްކަންޖެހޭކަން ފާހަގަ ކުރައްވައި ވިދާޅުވީ އެއީ މާލޭގެ ބިންތައް މިހާރު ހުރި ގޮތުން ފަސޭހަކަމެއް ނޫން ކަމަށެވެ.

އެހެންކަމުން ވެހިކަލް ގަރާޖުގެ މައްސަލަ މިހާރު ވަނީ ބޮޑު ވިޔަފާރިއަކަށް ބަދަލުވެފައި ކަމަށާއި މީގެ ތެރޭގައި ވަރަށް ނޭދެވޭ ކަންކަން ހިނގަމުން އަންނަ ކަމަށް މޭޔަރު ވިދާޅުވިއެވެ.

"ވެހިކަލް ރަޖިސްޓަރީ ކުރަން ގަރާޖު ޖާގައެއް ހޯދަން ވެއްޖެއްޔާ ކޮންމެވެސް މީހެއްގެ އަތުން އެމީހެއްގެ ގޭގައި އޮންނަ ޖާގައެއް ދައްކައިފައި އަށްޑިހަހާސް ނުވަތަ އެއްލައްކަ ރުފިޔާ ނުވަތަ އެއަށް ވުރެ ބޮޑު ޢަދަދެއްގެ ފައިސާ އެމީހާއަށް ދީފައި ގަރާޖު ސިޓީއެއް މިހޯދަނީ. ހޯދައިގެން ގެންގޮސް ގަރާޖު އޮތް ކަމަށް ހަދައިގެން ވެހިކަލް ރަޖިސްޓަރީ މިކުރަނީ. މިއީ ވަރަށް ނޭދެވޭގޮތެއްގައި ހިނގާ ކަމެއް. މިކަން މިހިނގަނީ ވަރަށް ބޮޑަށް ސަރުކާރު ތެރެއިން އެކި ފަރާތްތަކާ ގުޅިގެން. އެހެންވީމަ މިކަން އެބަޖެހޭ ހުއްޓުމަކަށް އަންނަން." މޭޔަރު ވިދާޅުވިއެވެ.

މާލޭ މޭޔަރު ވިދާޅުވީ މިއީ މިކަން އޮންނަންޖެހޭ ގޮތް ނޫން ކަމަށާއި އެކަން ޙައްލުކުރަން ޖެހޭ ކަމަށެވެ.

އެގޮތުން ކައުންސިލުން ދޭން ނިންމި ޕާކިންގ ސްލޮޓުތަކުގެ ތެރެއިން ސްލޮޓެއް ވެހިކަލް ރަޖިސްޓަރީ ކުރަން ބޭނުންވާ ނަމަ އެ ފުރުޞަތު ދިނުމަށް ވެސް ކައުންސިލުން ވަނީ ފާސްކޮށްފައެވެ.

މިއީ ކައުންސިލުން ސިއްރުން ނިންމި ނިންމުމެއް ނޫން ކަމަށާއި ކައުންސިލުގައި ނިންމޭ މިފަދަ ނިންމުންތަކަކީ ވަގުތުން ރައްޔިތުންނަށް ފެންނާނެހެން ބާއްވާ ބައްދަލުވުންތަކުގައި އެންމެންނަށް އެނގޭނެހެން ފާސްކުރެވޭ ކަންތައްތަކެއް ކަމަށް ވެސް މޭޔަރު ވިދާޅުވިއެވެ.

"ލައިވްކޮށް، ހުރިހާ ކައުންސިލަރުން ތިބެގެން އިއްތިފާޤުން ފާސްކުރި އުޞޫލެއްގައި މިއޮންނަނީ ވެހިކަލް ރަޖިސްޓަރީ ކުރުމަށް ގަރާޖް ސްޕޭސްއެއް ގޮތަށް އެ ސްލޮޓް ބޭނުންވާ ނަމަ، އެކަމަށް އެ ސްލޮޓް އެ ވެހިކަލަށް ރަޖިސްޓަރީ ކުރެވޭނެ ގޮތަށް އަޅުގަނޑުމެން މި އުޞޫލުގައި ބަޔާންކުރީ. އެއީ އެއްވެސް ޙާލެއްގައި އެމީހާއަށް އެބިންކޮޅު ލިބެނީކީއެއް ނޫން. ބިން ވިއްކުމެއް ނޫން. އެއްވެސް ޙާލެއްގައި ސިޓީ ކައުންސިލުން ބިމެއް ނުވިއްކާނެ. އެގޮތަކަށް މާލޭގެ މަގުމައްޗަކުން ބިމެއް ނުވިއްކޭނެ، ނުވެސް ވިއްކާނެ. އެއީ ވަކި އުޞޫލެއް އޮންނަ ކަމެއް. ގޯތި ވިއްކުމާއި ބިން ވިއްކުމަކީ ޤާނޫނުގައި ވަކި އިޖުރާޢަތްތަކެއް އޮންނަ ކަމެއް، ކޯޓަށް ވެސް ދާންޖެހޭ ކަމެއް. ކޯޓުން ނިންމައި ރަޖިސްޓަރީ ހަދައި، މިހުރިހާ ކަމެއް ހިނގާ ކަމެއް ބިން ވިއްކުމަކީ. މިކަމުގައި ބިންކާކަށް އެއްވެސް އިރަކު ކައުންސިލުން ނިންމައިފައެއް ނުވޭ އަދި ވިސްނާފައެއް ވެސް ނުވޭ." މުއިއްޒު ވިދާޅުވިއެވެ.

މޭޔަރު ވިދާޅުވީ ސިޓީ ކައުންސިލުން މަގުމަތިންނާއި އެކި ޒޯންތަކުން ކުއްޔަށްދޭ ޖާގަތަކަކީ ފެންނަން އޮންނާނެ ޖާގައެއް ކަމަށާއި އޭގެ ނަތީޖާއަކީ ޕާކިންގ ޖާގައެއް ކަށަވަރުވުން ކަމަށެވެ.

މީގެ އިތުރުން ވެހިކަލްތަކުގެ އުމުރު ސިޓީ ކައުންސިލުން ކަނޑައަޅާނެ ކަމަށާއި އަދި މިގޮތަށް ދޫކުރެވޭ ޕާކިންގ ސްލޮޓުތަކުގައި އެ ވެހިކަލެއްގެ އުމުރަށް އެތަނުގައި ބޭއްވޭނެ ކަމަށް ވެސް މުޢިއްޒު ވިދާޅުވިއެވެ.

ވެހިކަލް ވިއްކައިލައިފި ނަމަ ނުވަތަ އުމުރު ހަމަވެއްޖެ ނަމަ، ޖާގަ ގެއްލޭނެ ކަމަށާއި އަދި ކައުންސިލުގެ މަޝްރޫޢަކަށް އެ ޖާގަ އެހެން ދިމާލަކަށް ބަދަލުކުރަން ބޭނުންވެއްޖެ ނަމަ އެކަން ވެސް ކުރެވޭނެ ކަމަށާއި ކައުންސިލުން ނިންމައިފައިވަނީ ޕާކިންގ އިމާރާތްތައް އެޅުމުން އެ އިމާރާތްތަކުގެ ތެރެއަށް ގަރާޖު ސްލޮޓުތައް ވެސް ބަދަލުވާ ގޮތަށް ކަމަށް ވެސްޑރ.މުޢިއްޒު ވިދާޅުވިއެވެ.

ސިޓީ ކައުންސިލުން ދޫކުރަން ނިންމި ޕާކިންގ ސްލޮޓުތައް ގަރާޖެއްގެ ގޮތުގައި ބޭނުންކުރަން ބޭނުންވާ ނަމަ ފީއެއްގެ ގޮތުގައި ދައްކަން ޖެހެނީ 25،000 ރުފިޔާއެވެ.

މޭޔަރު ތަކުރާރުކޮށް ވިދާޅުވީ ބަޔަކު އޮޅުވާލަން މަސައްކަތް ކުރިޔަސް މިއީ ބިން ވިއްކުން ނޫން ކަމަށާއި މިއީ ރަގަޅު މަޤްޞަދެއްގައި ރައްޔިތުންނަށް ދިމާވެފައިވާ ތަކުލީފު ލުއިކޮށްދިނުމަށް ކުރަން ނިންމި ކަމެއް ކަމަށެވެ.

"އެކަަކު ވަރަށް ހިތާމަކުރަން ޓްރާންސްޕޯޓް މިނިސްޓްރީން އެއްވެސް ބެލުމެއް ނެތި، އަޅުގަނޑުމެންނާ އެއްވެސް ވަރަކަށް މަޝްވަރާ ކުރުމެއް ނެތި ރޭގަނޑުގެ ދަންވަގުތެއްގައި ބިން ވިއްކަނީއޭ ބުނެ ބަޔާން ނެރުނީތީ. އެކަހަލަ ދެކޮޅު ނުޖެހޭ ޒިންމާދާރުކަން ކުޑަ ގޮތެއްގައި ޙަޤީޤަތާ ޚިލާފު ވާހަކަތަކެއް، ކައުންސިލާ މެދު ރައްޔިތުން ހިތުގައި ނަފުރަތު އުފެއްދުމަށް ނޫނިއްޔާ ނުބައި ވިސްނުންތަކެއް އުފެއްދުމުގެ ނިޔަތުގައި ނޫނިއްޔާ އެކަހަލަ ވާހަކަތަކެއް ލިޔުއްވާނެ ކަމަކަށް އަޅުގަނޑަކަށް ޤަބޫލެއް ނުކުރެވޭ." މުއިއްޒު ވިދާޅުވިއެވެ.

މި މައްސަލައިގައި ލޯކަލް ގަވާމަންޓް އޮތޯރިޓީން ވެސް ކައުންސިލަށް ސިޓީއެއް ފޮނުވާފައިވާ ކަމަށާއި އެހެންކަމުން އެލްޖީއޭއާ ބައްދަލުކޮށް މިކަމުގެ ތެދު މަޢުލޫމާތު ވާނީ ހިއްސާކުރެވިފައި ކަމަށް އެމަނިކުފާނު ވިދާޅުވިއެވެ.

މޭޔަރު ވިދާޅުވީ އެލްޖީއޭގެ ސިޓީއާއި ޓްރާންސްޕޯޓް މިނިސްޓްރީން ނެރުނު ބަޔާނާއި އޭގެ އިތުރުން ބައެއް ރައްޔިތުންނަށް ލިބިފައިވާ ހިތްނުތަނަވަސްކަމުގެ ސަބަބުން ގަރާޖު ރަޖިސްޓަރީ ކުރުމުގެ ކަންތައް މިވަގުތަށް ކުރިއަށް ނުގެންދިއުމަށް ކައުންސިލުން ނިންމައިފައިވާ ކަމަށެވެ.

ނަމަވެސް މިކަން ރައްޔިތުންނަށާއި އިދާރާތަކަށް އޮޅުންފިލުވައިދިނުމަށް ފަހު ވަރަށް އަވަހަށް ކުރިއަށް ގެންދެވޭނެ ކަމަށް އުންމީދު ކުރައްވާ ކަމަށް ވެސް މުޢިއްޒު ވިދާޅުވިއެވެ.