އިއްޔެ އެކަނި ވެސް 7،000އަށް ވުރެ ގިނަ ފަތުރުވެރިން، ރިކޯޑް އަދަދެއް
ރާއްޖެއަށް ޒިޔާރާތްކުރާ ފަތުރުވެރިންގެ އަދަދު އިތުރުވެ، އަނެއްކާ ވެސް އެއް ދުވަހުގެ ތެރޭގައި ރެކޯޑް އަދަދަކަށް ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީން ހާމަކުރައްވައިފިއެވެ.
ޓޫރިޒަމް މިނިސްޓްރީން ވިދާޅުވީ ބޯޑަރު ހުޅުވައިލި ފަހުން އެއް ދުވަހެއްގެ ތެރޭގައި، އެންމެ ގިނަ ފަތުރުވެރިން އައިސްފައި ވަނީ މިމަހުގެ 12 ވަނަ ދުވަހު ކަމަށެވެ. އެދުވަހު 7،668 ފަތުރުވެރިން ރާއްޖެ ޒިޔާރަތް ކޮށްފައިވާ ކަމަށް ޓުއަރިޒަމް މިނިސްޓްރީން ހާމަކުރެއެވެ.
2020ވަނަ އަހަރާ އަޅާ ބަލާއިރު ރާއްޖޭގެ ފަތުރުވެރިކަން ވަނީ ވަރަށް ބޮޑުތަނުން ކުރި އަރައިފައެވެ. އެގޮތުން 2020ވަނަ އަހަރާއި 2021ވަނަ އަހަރު ރާއްޖެއަށް ވަނީ ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ލީޑިން ޑެސްޓިނޭޝަންގެ އެވޯޑް ވެސް ލިބިފައެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކަށް ބަލާއިރު 2020ވަނަ އަހަރު ރާއްޖެއަށް ޒިޔާރަތްކޮށްފައި ވަނީ ޖުމްލަ 555،495 ފަތުރުވެރިންނެވެ. 2021ވަނަ އަހަރު 1،321،932 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މި އަހަރުގެ މިހައިތަނަށް ރާއްޖެ އައިސްފައި ވަނީ 171،982 ފަތުރުވެރިންނެވެ.
އަހަރުގެ މިހައިތަނަށް ރާއްޖެއަށް އެންމެ ގިނަ އަދަދަކަށް ޒިޔާރަތްކޮށްފައި ވަނީ ރަޝިއާ ފަތުރުވެރިންނެވެ. އެގައުމުން 28،467 ފަތުރުވެރިން ރާއްޖެ އައިސްފައިވެއެވެ. ދެވަނައަށް އެންމެ ގިނަ ޢަދަދަކަށް ފަތުރުވެރިން އައިސްފައި ވަނީ އިނގިރޭސިވިލާތުންނެވެ. އެޤައުމުން 18،348 ފަތުރުވެރިން އައިސްފައިވެއެވެ. ތިންވަނައަށް އެންމެ ގިނަ ޢަދަދަކަށް ފަތުރުވެރިން އަންނަނީ އިންޑިއާއިންނެވެ. އަހަރުގެ މިހައިތަނަށް އިންޑިއާއިން 13،947 ފަތުރުވެރިން ރާއްޖެ އައިސްފައިވެއެވެ.
Ads by STO
