ލަވަކިޔުންތެރިޔާ ބައްޕީ ލެހެރީ މަރުވެއްޖެ
އިންޑިއާގެ މަޝްހޫރު ލަވަކިޔުންތެރިޔާ ބައްޕީ ލެހެރީ މިއަދު ފަތިހުގެ ވަގުތެއްގައި މަރުވެއްޖެއެވެ.
ބޭރުގެ ޚަބަރުތަކުން ބުނާ ގޮތުގައި އުމުރުން 69 އަހަރުގެ ބައްޕީ ލެހެރީ މަރުވީ މުމްބާއީގެ ހޮސްޕިޓަލެއްގައެވެ.
ލަވަކިޔުމުގެ އިތުރުން ވަރަށް ގިނަ ލަވަ ހަދައިފައިވާ ބައްޕީ ލެހެރީ ވަނީ މިދިޔަ އަހަރުގެ އޭޕްރިލް މަހު ކޮވިޑަށް ފައްސިވެފައެވެ. ރިޕޯޓުތަކުން ބުނާ ގޮތުގައި އޭނާގެ ހާލު ބޮޑަށް ދެރަވާން ފެށީ ކޮވިޑަށް ފައްސިވުމަށް ފަހުގައެވެ. އެ ގޮތުން ހިނގާބިނގާވެ އުޅުމަށް ވެސް ބައްޕީ ލެހެރީއަށް ދަތިތަކަކާ ކުރިމަތިވި ކަމަށާއި އެކަމުގެ ސަބަބުން ފުރޮޅުލީ ގޮނޑިއެއްގައި އޭނާ އިންނަން ޖެހުނު ކަމަށް ވެސް ބުނެފައިވެއެވެ. މީގެ އިތުރުން ޖޫހޫގައި އޭނާ ދިރިއުޅޭ އެޕާޓްމަންޓުގައި ލިފްޓު ވެސް ބަހައްޓަން ޖެހުނު ކަމަށް ބުނެފައިވެއެވެ.
ބައްޕީ ލެހެރީ ފަހުން ދިޔައީ ވަރަށް ގިނަ ބަލިތަކަށް ފަރުވާ ހޯދަމުން ކަމަށާއި އެކަމުގެ ސަބަބުން ބެޑް ރެސްޓް ކުރަން ވެސް ޑޮކްޓަރުން އިރުޝާދު ދިން ކަމަށް ރިޕޯޓުތަކުން ބުނެފައިވެއެވެ.
ނަމަވެސް އިއްޔެ ކުއްލި ގޮތަކަށް ބައްޕީ ލެހެރީގެ ހާލު ދެރަވުމުގެ ސަބަބުން އޭނާ ހޮސްޕިޓަލަށް ގެނެސް ފަރުވާ ދޭން ފެށި ކަމަށާއި، ޑޮކްޓަރުންގެ ބުރަ މަސައްކަތުން ވެސް އޭނާގެ ފުރާނަ ސަލާމަތް ނުކުރެވުނު ކަމަށް ރިޕޯޓުތަކުން ބުނެއެވެ.
ގިނަ ބަޔަކު ބައްޕީ ލެހެރީ ފާހަގަ ކޮށްފައިވަނީ އޭނާ އަޅާ ގިނަ އަދަދެއްގެ ރަން ފަށްތަކާއި އަބަދުވެސް އަވި އައިނު އަޅައިގެން ހުންނަ މީހެއްގެ ގޮތުގައެވެ. އޭނާ އެހައި ގިނަ ރަންފަށް އަޅަނީ "އެސްފިނާއިން ސަލާމަތްވާން" ކަމަށް މީގެ ކުރީގެ އިންޓަވިއުއެއްގައި ވަނީ ބުނެފައެވެ.
