ކޮމަންޑޫ ދާއިރާގެ މެމްބަރުގެ ނަން ރައީސް ނަޝީދަށް ތިން ފަހަރު ވެސް ވިދާޅުވެވުނީ ނުބައިކޮށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް، ކޮމަންޑޫ ދާއިރާއަށް އަލަށް ހޮވިވަޑައިގެންނެވި މެމްބަރު މުހައްމަދު ރާޝިދު(ރާޑޯ)ގެ ނަން އޮޅިވަޑައިގެންފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވައި ދެއްވަމުން، މަޖިލީހުގެ ރައީސް މުހައްމަދު ނަޝީދު ވަނީ މަޖިލީހުގެ ކޮމެޓީތަކަށް އައިސްފައިވާ ބައެއް ބަދަލުތައް ވިދާޅުވެދެއްވައިފައެވެ.
އެގޮތުން ތިން ކޮމެޓީއަކަށް ރާޝިދު ހަމަޖައްސައިފައިވާއިރު، ނަޝީދަށް ތިން ފަހަރު ވެސް، ރާޝިދުގެ ނަން ވިދާޅުވެވުނީ ނުބައިކޮށެވެ. އެގޮތުން ނަޝީދު ވިދާޅުވީ "މުހައްމަދު ރާޝިދު"ގެ ބަދަލުގައި "މުހައްމަދު ރަޝީދު"އެވެ.
އެމަނިކުފާނު ފަހުން ވަނީ މިކަމަށް މާފަށް ވެސް އެދިވަޑައިގެންފައެވެ.
ކޮމިޓީތަކަށް ގެނައި ބަދަލުތަކަށް ބަލާއިރު، މާލިއްޔަތު ކޮމެޓީއަށް އެމްޑީޕީގެ ފަރާތުން، ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒު ވަނީ ހަމަޖައްސައިފައެވެ. އާންމު ކޮމެޓީގައި އެމްޑީޕީގެ ފަރާތުން ހިމެނިވަޑައިގަންނަވާ މެމްބަރު މުމްތާޒުގެ ބަދަލުގައި އެ ކޮމިޓީއަށް ކޮމަންޑޫ ދާއިރާގެ މެމްބަރު ރާޝިދު ވަނީ ހަމަޖައްސަވައިފައެވެ.
ލާމަރުކަޒީ ކޮމެޓީއަށް އެމްޑީޕީގެ ފަރާތުން ހަމަޖައްސައިފައިވާ، މަޑަވެލި ދާއިރާގެ މެމްބަރު ހުސައިން ފިރުޝާންގެ ބަދަލުގައި އެކޮމިޓީއަށާއި، އިމްތިޔާޒާއި ސުލޫކު ކޮމެޓީއަށް ވެސް ރާޝިދު ވަނީ ހަމަޖައްސައިފައެވެ.
