ހައިކޯޓުގެ އަމުރެއް ސަސްޕެންޑުކުރަން މެޖިސްޓްރޭޓަކު އަމުރު ނެރެފި
ރާއްޖެއަށް 98 ކިލޯގެ މަސްތުވާތަކެތި އެތެރެކުރި މައްސަލައެއްގައި ހައިކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުކޮށްފައި ވަނިކޮށް، ހައިކޯޓުގެ އެ އަމުރު ސަސްޕެންޑުކޮށް އޭނާ ދޫކޮށްލަން އައްޑޫސިޓީ ހިތަދޫ މެޖިސްޓްރޭޓް ކޯޓުން އަމުރެއް ނެރެފިއެވެ.
ދެހާސް ވިހިވަނަ އަހަރު، ކަނޑުމަގުން އައްޑޫއަށް 98 ކިލޯގެ މަސްތުވާތަކެތި އެތެރެކުރަނިކޮށް އަތުލައިގަތް މައްސަލައިގައި ދައުވާލިބޭ ހިތަދޫ/ މަންދޫބުގޭ ރުޝާން އަހުމަދު ދީދީ މިހައިތަނަށް ހުރީ ހައި ކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުކޮށްފައެވެ. އެނގިފައިވާ ގޮތުގައި ޝަރީއަތް ނިމެންދެން ރުޝާން ބަންދުކުރަން ހައި ކޯޓުން އެ އަހަރުގެ އޮކްޓޫބަރު މަހުގައި އަމުރު ނެރުނީ ވެސް ހިތަދޫ ކޯޓުން އޭނާ ދޫކޮށްލުމުންނެވެ.
ނަމަވެސް ހައިކޯޓުން ކޮށްފައިވާ އެ އަމުރު ތިން މަހަށް ސަސްޕެންޑުކޮށް، ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަހުމަދު، ރުޝާން ދޫކޮށްލަން އިއްޔެ ވަނީ އަމުރެއް ނެރެފައެވެ. އެ އަމުރުގައި ބުނެފައިވަނީ، ޝަރުތުތަކަކާ އެކު ރުޝާން ބަންދުން ދޫކޮށްލަން އަމުރު ނެރުނީ، އޭނާގެ ބޭސް ފަރުވާއަށް ކަމަށެވެ.
ހައި ކޯޓުން މިފަދައިން އަމުރު ކުރި ނަމަވެސް، ޤާނޫނު އޮންނަ ގޮތުން، މަތީ ކޯޓުގެ އަމުރެއް ސަސްޕެންޑު ކުރުމުގެ ބާރެއް ދަށު ކޯޓަށް ލިބިގެނެއް ނުވެއެވެ. އަދި މަތީ ކޯޓުތަކުން ނެރޭ އަމުރަށް ދަށު ކޯޓުތަކުން ތަބާއަވުން ޤާނޫނީ ގޮތުން ލާޒިމެވެ.
