އިންޑިއާ އައުޓް ކެމްޕެއިން ފަށަން ޖެހުނު ސަބަބު އުމަރު ވިދާޅުވެދެއްވައިފި
"އިންޑިއާ އައުޓް" ގޮވައި، އެ ކެމްޕެއިން ފަށަން ޖެހުނީ، ގާނޫނީ ސަރުކާރަކުން، ރާއްޖޭގައި ތިބި އިންޑިއާ ސިފައިން ފައިބާން އެންގުމުން، އެކަމަށް ދެކޮޅު ހެދުމުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ގޮވައިލައި، އިދިކޮޅު ފަރާތްތަކުން ކުރިއަށް ގެންދާ "އިންޑިއާ އައުޓް" ކެމްޕެއިނާ ގުޅޭގޮތުން ދިވެހި ޗެނަލްގެ "ހަވާސާ" ޕްރޮގްރާމްގައި ވާހަކަ ދައްކަވަމުން އުމަރު ނަސީރު ވިދާޅުވީ "އިންޑިއާ އައުޓް" ގޮވަނީ، އެ ގައުމުގެ ރައްޔިތުން ރާއްޖެއިން ބޭލުމަށް ނޫން ކަަމަށާއި، ރާއްޖެއާ އިންޑިއާއާ ދެމެދު އޮތީ ގާތް ގުޅުމެއް ކަަމަށެވެ.
އެހެން ނަމަވެސް އެގައުމުގެ ސިފައިން ޖެހޭނީ މި ފަސްގަނޑުން ފައިބާން ކަމަށް ވެސް އޭނާ ވިދާޅުވިއެވެ.
އުމަރު ވިދާޅުވީ އިންޑިއާގެ އަސްކަރިއްޔާ ރާއްޖެ އައިސްފައި ވަނީ އަމިއްލައަށް ނޫން ކަމަށެވެ.
އޭނާ އެ އިޝާާރާތް ކުރެއްވީ، ރައީސް މުހައްމަދު ނަޝީދުގެ ވެރިކަމުގައި، 2010ވަނަ އަހަރު، އިންޑިއާއިން ރާއްޖެއަށް ހަދިޔާ ކުރި ފުރަތަމަ ހެލިކޮޕްޓަރާ އެކު އެގައުމުގެ ސިފައިން ގެނައި ގެނައުމަށެވެ.
އުމަރު ވިދާޅުވީ އިންޑިއާ ސިފައިން ރާއްޖެ އައީ، ދިވެހި ސަރުކާރުން ދައުވަތު ދީގެން ކަމަށްވާތީ، އެމީހުން ފޮނުވާލުމަށް އަންގަން ޖެހޭނީ ވެސް ސަރުކާރުން ކަމަށެވެ.
"އިރާދަކުރެއްވިއްޔާ، އިންޑިއާ ސިފައިން ފައިބަން ޖެހޭނީ ހަމަ، ދެން އަންނަ ސަރުކާރަކުން ބާލާނެ." އޭނާ ވިދާޅުވިއެވެ.
މީގެ އިތުރުން އުމަރު ވަނީ "އިންޑިއާ އައުޓް"ގެ ނަމުގައި އިދިކޮޅުން ހިންގާ ކެމްޕެއިނުގެ ނަން "އިންޑިއާ މިލިޓަރީ އައުޓް"އަށް ބަަދަލު ކުރުމަކީ އެންމެ ރަނގަޅުވާނެ ގޮތް ކަމަށް ވެސް ވިދާޅުވެފައެވެ.
Ads by STO
