ޔޫކްރެއިންގައި ތިބި ދަރިވަރުންގެ އަތުގައި ކާބޯތަކެއްޗާއި ފައިސާ ހުރިތޯ ޔަޤީން ކޮށްފިން: މިނިސްޓްރީ

ޔޫކްރެއިންގައި ތިބި ދިވެހި ދަރިވަރުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ކުރެވެމުންދާ ކަމަށާއި ދަރިވަރުންގެ ހާލު ގާތުން ބަލަމުން އަންނަ ކަމަށް ފޮރިން މިނިސްޓްރީން ވިދާޅުވެއްޖެއެވެ.

Ads by Sosun Fihaara

ފޮރިން މިނިސްޓްރީގެ ކޮމިއުނިކޭޝަން ޑިރެކްޓާ މިއުވާން މުހައްމަދު ވިދާޅުވީ ޔޫކްރެއިންގައި މިހާރު ތިބި ދިވެހި ދަރިވަރުން ރައްކާތެރި ހިސާބުތަކަށް ގެންދިޔުމަށް އެސަރަހައްދުގެ އެހެން ގައުމުތަކުގެ ސަރުކާރާ އެކު މިނިސްޓްރީން މަޝްވަރާ ކުރަމުން ދާކަމަށެވެ. އަދި މިމަޝްވަރާތައް އެހެން ގައުމުތަކާ އެކު ވެސް ކުރިއަށް ގެންދާކަމަށް މިއުވާން ވިދާޅުވިއެވެ.

"ހުރިހާ ދަރިވަރުންގެ ހާލުވެސް ރަނގަޅު"

- ފޮރިން މިނިސްޓްރީ

މީގެ އިތުރުން ޔޫކްރެއިންއާއި ކައިރި އެހެން ގައުމުތަކުގައި ތިބި ދިވެހި ދަރިވަރުންގެ ހާލު ވެސް ވަރަށް ގާތުން ބަލަމުންދާ ކަމަށް މިއުވާން ވިދާޅުވިއެވެ. މި ގޮތުން ކާބޯތަކެއްޗާއި ފެނުގެ އިތުރުން، ނަޤުދު ފައިސާ ހުރިކަން ޔަޤީން ކުރެވުނު ކަމަށް އޭނާ ވިދާޅުވިއެވެ.

ޔޫކްރެއިންގައި ތިބި 50އަށް ވުރެ ގިނަ ދިވެހި ދަރިވަރުންގެ ތެރެއިން ގިނަ ކުދިން މިހާރު ވަނީ މާލެ އައިސްފައެވެ. ރަޝިޔާއިން މިވަގުތު ހަމަލާ ދެމުން ގެންދާ ޚާކީވްގައި ދިވެހި 5 ދަރިވަރަކު ތިބިކަމަށް މައުލޫމާތު ލިބެއެވެ. އެ ދަރިވަރުންގެ ހާލު ވެސް ރަނގަޅުކަމަށް މައުލޫމާތު ލިބެއެވެ.

ރަޝިޔާއިން ޔޫކްރެއިންއަށް ހަމަލާ ދޭން ފަށައިފައި މި ވަނީ އިންޒާރުތައް ދެމުން ދާތާ މަހެއްހާ ދުވަސް ފަހުންނެވެ. އެހެންކަމުން މިހާރު އުފެދިފައި އޮތް ހަނގުރާމައިގެ ހާލަތަކީ ކުރިން ވެސް ކުރިމަތިވެދާނެކަމަށް ބެލެވިފައި އޮތް ހާލަތެކެވެ.

ހަނގުރާމަ ފެށިއިރު ޔޫކްރެއިންގައި ތާށިވެފައި ތިބި ދިވެހި ދަރިވަރުން އަނބުރާ ރާއްޖެ ގެނެވިފައި ނުވާތީ ފޮރިން މިނިސްޓްރީއަށް ދަނީ ފާޑުކިޔުން އަމާޒުވަމުންނެވެ. މިމައްސަލައިގައި މިނިސްޓްރީން މާ ބޮޑެތި މަސައްކަތްތަކެއް ކޮށްފައި ނުވާކަން ވެސް ފާހަގަކޮށްލެވެއެވެ.

ފޮރިން މިނިސްޓަރު އަބްދުﷲ ޝާހިދު މިވަގުތު ވެސް އެމެރިކާގައި ހުންނެވިއިރު، އެމެރިކާއަކީ ރަޝިޔާ ޔޫކްރެއިންގެ މަޝްރަހު އެންމެ ބޮޑަށް ދިރާސާ ކުރާ ގައުމެވެ. އަނެއްކޮޅުން އދ. ފަދަ ބައިނަލްއަގުވާމީ ޖަމިއްޔާއެއްގެ ވެރިޔަކު ރާއްޖޭގެ ފޮރިން މިނިސްޓަރަކަށް ހުންނެވި އިރު ވެސް ދިވެހި ދަރިވަރުންނަށް ރައްކާތެރިކަން ކަށަވަރުކޮށް ނުދެވުމަކީ އޮތް ކަންބޮޑުވުމެކެވެ.

ކުރިއަށް އޮތް 48 ގަޑިއިރުގެ ތެރޭގައި ރަޝިޔާއާއި ޔޫކްރެއިންގެ ހަނގުރާމައިގެ ހާލަތު އިތުރަށް ގޯސްވާނެކަމަށް އޮތީ ބެލެވިފައެވެ. ބައިނަލްއަގުވާމީ ބައެއް މީޑިއާ ރިޕޯޓުތައް ބުނާ ގޮތުން މައްސަލަ ނިމޭނީ ރަޝިޔާގެ ބާރުގެ ދަށަށް ޔޫކްރެއިން ގެނައުމަށް ފަހުއެވެ.