ޔޫކްރެއިން މައްސަލައިގައި ޗައިނާ، އެމެރިކާއަށް: ތީ ވާހަކަ ދައްކަން އެންމެ ރަނގަޅު ޤައުމެއް ނޫން!
ރަޝިޔާއިން ޔޫކްރެއިންއަށް އަރައި ހަމަލާ ދެމުންދާ މައްސަލައިގައި އެމެރިކާ ވެސް ކުށްވެރިވާ ކަމަށް ޗައިނާގެ ފޮރިން މިނިސްޓްރީން ވިދާޅުވެއްޖެއެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ހުއާ ޗަނީން މީޑިއާއަށް ދެއްވި އިންޓަރވިއުއެއްގައި ވިދާޅުވީ، އެމެރިކާއިން މިއަދު ރަޝިއާގެ އަމަލުތައް ކުށްވެރި ކުރަމުންދާއިރު، ރަޝިއާގެ އަސްކަރިއްޔާއިން ޔޫކްރެއިނަށް އަރައިފައިވަނީ އެމެރިކާގެ ސަބަބުން ކަމަށެވެ. މިގޮތުން އެމެރިކާއިން އަބަދުވެސް ހަނގުރާމައެއް ކުރަން ބޭނުންވާ ކަމަށާއި ރަޝިއާ-ޔޫކްރެއިން މައްސަލަ ފެށުމުގެ އަސްލަކީ އެމެރިކާކަމަށް އޭނާ ތުހުމަތު ކުރެއްވިއެވެ.
"އަލިފާން ނިއްވުމަށް އެހެން މީހުން ކުރާ މަސައްކަތް ނުކުރާ ކަމަށް ތުހުމަތުކޮށް، އެހެން މީހުންގެ މައްޗަށް ދަޢުވާ ކުރާއިރު، ހުޅުގަނޑުގެ މައްޗަށް ތެޔޮ އޮއްސަމުން ދާ ބަޔަކީ އެމެރިކާ، މިފަދަ ޢަމަލުތަކަކީ ވަރަށް ޒިންމާދާރުކަން ކުޑަ، ނާތަހުޒީބު ޢަމަލުތަކެއްކަން ސާފުކޮށް އެނގެން އެބައޮތް،" ހުއާ ވިދާޅުވިއެވެ
ހުއާ ވިދާޅުވީ، ޗައިނާއަކީ އެއްވެސް އިރެއްގައި ހަމަނުޖެހުމަށް ތާއީދު ކުރާ ބައެއް ނޫން ކަމަށެވެ. އަދި ޗައިނާގެ ތާއީދު މިކަމުގައި ރަޝިއާއަށް ނެތް ކަމަށް އޭނާ ވިދާޅުވިއެވެ.
ހުއާ ވަނީ އެމެރިކާއިން މުނާފިގުކަމުގެ ތުހުމަތު ކުރައްވައި، އިރާގާއި އަފްޣާނިސްތާނުގެ ސިޔާދަތާއި ސަރަހައްދީ މިނިވަންކަމަށް ވޮޝިންޓަންއިން އިހުތިރާމް ކުރޭތޯ ސުވާލު ކުރައްވައިފައެވެ. އަދި ރަޝިއާއިން އަމަލު ކުރަމުންދާ ގޮތަށް އެމެރިކާއިން ވެސް ކުރިކަން ފާހަގަ ކުރަމުން ކުށެއް ނެތް މީހުން ހަމައެކަނި މަރަނީ ރަޝިޔާއިންތޯ ނުވަތަ އެމެރިކާއިން މިފަދަ ކަންކަން ކުރޭތޯ ސުވާލު ކުރައްވައިފައި ވެއެވެ. އެކަމަނާ ވަނީ "މި ސުވާލުތައް ސީރިއަސްކޮށް ނަންގަވައި ޑަބަލް ސްޓޭންޑަޑް ދޫކޮށްލެއްވުމަށް" އެމެރިކާއަށް ގޮވައިލައްވައިފައެވެ.
މިހާރު ހިނގަމުންދާ ޔޫކްރެއިންގައި ކަންތައްތަކަކީ "ކޮމްޕްލެކްސް" ކަމެއްގެ ގޮތުގައި ސިފަކުރައްވަމުން ތަރުޖަމާނު ވަނީ ބެއިޖިންއިން ރަޝިޔާއަށް އަސްކަރީ އެހީތެރިކަން ނުދޭކަން ކަށަވަރުކޮށްދެއްވައިފައެވެ. އަދި އެކަމަނާ ވަނީ ހުރިހާ ފަރާތްތަކަކުން ވެސް "ނުތަނަވަސްކަން އިތުރުކުރުމުގެ ބަދަލުގައި ސުލްހައަށް މަސައްކަތް ކުރުމަށް" ނުވަތަ "ބިރުވެރިކަން ފިލުވައިލުމަށް" ގޮވައިލައްވައިފައެވެ.
