ނައިބު ރައީސް މާދަމާ ރައީސްކަމުގެ މަސްއޫލިއްޔަތުގެ ހުވާކުރައްވަނީ
ރައީސުލް ޖުމްހޫރިއްޔާކަމުގެ މަސްއޫލިއްޔަތު ވަގުތީ ގޮތުން ނައިބު ރައީސް ފައިސަލް ނަސީމްއާ ހަވާލު ކުރެއްވުމަށް ރައީސް އިބްރާހިމް މުހައްމަދު ޞާލިޙް މިރޭ ނިންމެވުމާ ގުޅިގެން، އެ މަގާމުގެ މަސްއޫލިއްޔަތުގެ ހުވާ ކުރެއްވުން މާދަމާ ހެނދުނު ބޭއްވުމަށް ނިންމަވައިފިއެވެ.
ސިންގަޕޫރުގައި ހުންނަވައި ރައީސް ޞާލިޙް މިރޭ ކުރެއްވި ޓްވީޓެއްގައި ވިދާޅުވީ، އެމަނިކުފާނުގެ ތައިރޮއިޑް އޮޕަރޭޝަނެއް ކުރެއްވުމަށް ޑޮކްޓަރުން ލަފާ ދެއްވައިފައިވާތީ، ވަގުތީ ގޮތުން ރައީސްކަމުގެ މަސައްކަތްޕުޅުތަކުން އެކަހެރިވެވަޑައިގެން އެ މަސްއޫލިއްޔަތު ނައިބު ރައީސްއާ ވަގުތީ ގޮތުން ހަވާލު ކުރެއްވުމަށް ނިންމަވައި، އެކަން ރަސްމީކޮށް ރައްޔިތުންގެ މަޖިލީހުގެ ރައީސްއަށް ވެސް އަންގަވައިފައިވާނެ ކަމަށެވެ.
އެނގިފައިވާ ގޮތުގައި، ރައީސްކަމުގެ މަސްއޫލިއްޔަތުގެ ހުވާ ނައިބު ރައީސް ފައިސަލް ނަސީމް ކުރައްވާނީ މާދަމާ ހެނދުނު 6:00ގައެވެ.
ރައީސުލްޖުމްހޫރިއްޔާގެ އޮފީހާއި މަޖިލީސް އަދި ސުޕްރީމް ކޯޓް ގުޅިގެން އެކަމުގެ ތައްޔާރީތައް މިހާރު ކުރިއަށް އެބަގެންދަވާ ކަމަށް ވެސް މައުލޫމާތު ލިބިފައިވެއެވެ.
