ޗެއަރޕާސަން އިންތިޚާބު: ފައްޔާޒް މިލަންދުއަށް، އިންތި ފުވައްމުލަކަށް
އޭޕްރީލް 16ވަނަ ދުވަހު އޮންނަ، ސަރުކާރު ހިންގާ މައި ކޯލިޝަން އެމްޑީޕީ ޗެއާޕާސަންގެ އިންތިހާބުގައި ވާދަ ކުރައްވާ އިކޮނޮމިކް މިނިސްޓަރ ފައްޔާޒުގެ ޓީމު ނ. މިލަންދުއަށް އަދި މާފަންނު އުތުރު ދާއިރާގެ މެންބަރު އިމްތިޔާޒު ފަހުމީގެ ޓީމު ފުވައްމުލަކަށް ވަޑައިގަންނަވައިފިއެވެ.
މިލަންދުއަށް ވަޑައިގެން މިއަދު އެ ރަށުގައި "ހިންގާލުން" ކެންޕެއިން ރަސްމީކޮށް ފަށާނެއެވެ. މިއީ މިފަހަރުގެ އިންތިޚާބުގައި ފައްޔާޒާއި އޭނާގެ ޓީމުން ގެންގުޅުއްވާ ޝިއާރެވެ. ފައްޔާޒާ އެކު، މިއަދު މިލަންދުއަށް ވަޑައިގެންނެވި ޓީމުގައި ދައުލަތުގެ ވަޒީރުންނާއި، މަޖިލީހުގެ ގިނަ އަދަދެއްގެ މެމްބަރުންނާއި، އެމްޑީޕީގެ އިސްސަފުގެ ގިނަ މެމްބަރުން ހިމެނެއެވެ.
މި އިންތިޚާބުގައި ދެން ވާދަ ކުރައްވާ، އިންތި މިއަދު ވަޑައިގަތީ ފުއްވަމުލަކަށެވެ. އިންތިއާ އެކު މަޖިލީހުގެ ބައެއް މެންބަރުން އެ ރަށަށް ވަޑައިގެންފައިވެއެވެ. އިންތިގެ ކެންޕެއިން ހަރަކާތްތައް މި މަހުގެ 27ވަނަ ދުވަހުގެ ނިޔަލަށް އެ ސިޓީގައި ކުރިއަށް ގެންދިއުމަށް ވަނީ ހަމަޖެހިފައެވެ.
މި އިންތިހާބު ގިނަ ބަޔަކު ސިފަ ކުރަނީ އެމްޑީޕީގެ އިސް ލީޑަރު އަދި ރައީސް އިބްރާހިމް މުހައްމަދު ޞާލިހާއި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ތާއީދު އޮތް މިންވަރު ވަޒަން ކޮށްލެވޭނެ އިންތިހާބެއްގެ ގޮތުގައެވެ. މައުލޫމާތު ފެތުރޭ ގޮތުގައި މި އިންތިޚާބުގައި ރައީސް ޞާލިހްގެ ތާއީދު އޮތީ ފައްޔާޒަށެވެ. ރައީސް ނަޝީދުގެ ތާއީދު އޮތީ އިންތިއަށެވެ.
