ތަފާސްހިސާބު 2020: 50އިންސައްތަ އަންހެނުން ވިހެއީ ސިޒޭރިއަން ހަދައިގެން
ރާއްޖޭގައި 2020ވަނަ އަހަރުގައި ދެބައިކުޅަ އެއްބައި އަންހެނުން ވިހެއީ ސިޒޭރިއަން ނުވަތަ ސީ-ސެކްޝަން ހަދައިގެންކަން ހާމަވެއްޖެއެވެ.
މިކަން ހާމަކޮށްފައި ވަނީ "މޯލްޑިވްސް ހެލްތު ސްޓެޓިސްޓިކްސް 2020"ގައެވެ. މިއީ ރާއްޖޭގެ ސިއްހީ ތަފާސް ހިސާބުތައް ދެނެގަތުމަށް ޓަކައި އެކުލަވައިލެވިފައިވާ ފޮތެވެ.
މިއަދު އާންމު ކުރި މި ފޮތުގައިވާ ތަފާސްހިސާބުތައް ދައްކާ ގޮތުގައި ރާއްޖޭގެ 40 އިންސައްތަ ޑޮކްޓަރުންނަކީ ސްޕެޝަލިސްޓް ޑޮކްޓަރުންނެވެ. އަދި ރާއްޖޭގައި މަސައްކަތް ކުރަމުން އަންނަ ނަރުހުންގެ 59 އިންސައްތައަކީ ދިވެހީންނެވެ.
އަދި 2020ވަނަ އަހަރުގައި، 50 އިންސައްތަ އަންހެނުން ސިޒޭރިއަން ހަދައިގެން ވިހައިފައިވާއިރު، އެޑްމިޓް ކޮށްގެން ފަރުވާ ދިން މީހުންގެ 35އިންސައްތައަކީ، ގައިން ގައިން ނާރާ ބަލިތަކުގައި ފަރުވާ ހޯދި މީހުންނެވެ.
އަދި 2020ވަނަ އަހަރު މުޅި ދުނިޔޭގައި ވެސް ހަލުވިކަމާ އެކު ފެތުރެމުންދިޔަ ކޮވިޑް-19ގެ ބަލިމަޑުކަމުގައި ރާއްޖެއިން 13000އަށް ވުރެ ގިނަ މީހުން މި ބައްޔަށް ފައްސިވެފައިވާ ކަމަށް ވެސް "ހެލްތު ސްޓެޓިސްޓިކްސް" ފޮތުގައިވެއެވެ.
ހެލްތު މިނިސްޓްރީން ބުނީ، މި ހޯދުންތަކުގެ އަލީގައި ސިއްޙީ ދާއިރާ އިތުރަށް ހަރުދަނާ ކުރުމަށް ޓަކައި މުހިއްމު ސިޔާސަތުތައް ކަނޑައެޅުމަށް މަގުފަހި ވެގެންދާނެ ކަމަށެވެ. އަދި ސިއްޙީ ޕްރޮގްރާމްތައް ރޭވުމަށާއި ސިއްޙީ ކަންކަން ރަގަޅު ކުރުމަށް އެޅޭނެ ފިޔަވަޅުތައް ހަރުދަނާކުރުމަށް ވެސް އެހީތެރިކަން ލިބިގެންދާނެ ކަމަށް ވެސް ވަނީ ބުނެފައެވެ.
