ޔޫކްރޭން ހަނގުރާމަ: ގެންގުޅޭ ކުއްތާއާ ވަކީން ގައުމަށް ދާކަށް އިންޑިއާގެ ދަރިވަރަކު ބޭނުމެއް ނުވި!
ހަނގުރާމަ ހިނގަމުންދާ ޔޫކްރޭންގައި ކިޔަވަމުންދާ އިންޑިއާގެ ދަރިވަރަކު ގައުމަށް ދާން ބޭނުންވި ނަމަވެސް ގެންގުޅޭ ކުއްތާ ނުލައި ދާން ޖެހުމުން އެ ގޮތް ގަބޫލު ނުކޮށް އަމިއްލައަށް ޔޫކްރޭންގައި ތާށިވެއްޖެއެވެ.
މީޑިއާތައް ބުނާ ގޮތުގައި އެ ދަރިވަރަކީ ، ހަމަލާ ބަދަލުކުރަމުންދާ އެއް ސިޓީކަމުގައިވާ ޚާކިވްގެ ޚާކިވް ޔުނިވަރސިޓީ އޮފް ރޭޑިއޯ އިލެކްޓްރޯނިކްސްގައި ކިޔަވަމުންދާ ރިޝްބާހް ކޯސިކެވެ. އޭނާއަކީ އިންޖިނިއަރިންގެ ޑިގްރީގައި ފަހު އަހަރު ކިޔަވަމުންދާ ޒުވާނެކެވެ.
މީޑިއާތަކަށް މައުލޫމާތު ދެމުން ކޯޝިކް ބުނެފައި ވަނީ ކުއްތާއާ އެކު އިންޑިއާއަށް ދިޔުމަށް ވަރަށް ގިނަ މަސައްކަތްތަކެއް ކުރެވިއްޖެ ކަމަށާއި ނަމަވެސް އެކަމަށް ހައްލެއް ލިބިފައި ނުވާ ކަމަށެވެ. އެގޮތުން ޖަނަވާރުންގެ ކަންތައްތައް ބަލަހައްޓާ އިންޑިއާގެ އިދާރާއާއި ޔޫކްރޭންގައި ހުންނަ އިންޑިއާގެ އެމްބަސީއާ ވެސް މިކަމާ މަޝްވަރާ ކުރެވިއްޖެ ކަމަށާއި އެމީހުން އެދެނީ ޓިކެޓާއި އިތުރު ލިޔެކިޔުންތައް ހުށަހެޅުމަށް ކަމަށް އޭނާ ބުނެފައި ވެއެވެ.
"އެމީހުން އަހަނީ އަހަރެންގެ ޓިކެޓް ކޮބައިތޯ؟ ޔޫކްރެއިންގެ ވައިގެ ސަރަހައްދު ބަންދުކޮށްފައި އޮތް އިރު އަހަރެން ކިހިނެއް ޓިކެޓެއް ހޯދާނީ؟" ކޯޝިކް ބުނެފައި ވެއެވެ.
އޭނާ ބުނީ ކުއްތާ ގެންދިޔުމާ މެދު އިންޑިއާގެ ކަމާ ގުޅޭ އިދާރާއިން އިޢުތިރާޟެއް ނެތްކަމުގެ ލިޔުން ލިބުނު ނަމަ މިހާރު އޭނާ ހުރީހީ އިންޑިއާގައި ކަމަށެވެ. އަދި ރައްކާތެރިވުމުގެ ގޮތުން އޭނާ މިހާރު ހުރީ ބިންގަރާހެއްގައި ކަމަށާއި އެ ތަނަކީ ވަރަށް ފިނިތަނަކަށް ވުމާ އެކު ކުއްތާގެ ސަލާމަތަށް ޓަކައި އެއަށް ހޫނުކަން ހޯދައިދިނުމަށް ކޮންމެ ދުވަހަކު އެތައް ފަހަރަކު އެތަނުން ނިކުންނަށް ޖެހޭކަމަށް ވެސް ކޯޝިކް ބުނެފައި ވެއެވެ.
