އީމާން އޮތީ ވެންޓިލޭޓަރުގައި، މަރެއް ނުވޭ!
ހުޅުމާލޭގައި އިއްޔެ ހިނގި ނުރައްކާތެރި އެކްސިޑެންޓުގައި އަނިޔާވި މާލޭ ސިޓީގެ ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރު އުމުރުން 29 އަހަރުގެ އާމިނަތު އީމާން ނިޔާވި ކަމަށް ދެކެވޭ ވާހަކަ އާއިލާއިންނާއި އޭނާއަށް ފަރުވާދޭ އޭޑީކޭ ހޮސްޕިޓަލުން ދޮގުކޮށްފިއެވެ.
“ދެން”އަށް މަޢުލޫމާތު ލިބިފައިވާ ގޮތުގައި އީމާން އަދިވެސް އޮތީ ވެންޓިލޭޓަރުގައެވެ.
އީމާން ނިޔާވި ޚަބަރު މީގެ ކުރީން ފެތުރިފައި ވަނީ އޭނާގެ ޢާއިލާ މެމްބަރަކާ ހަވާލާދީ އޭނާ މަސައްކަތް ކުރާ މާލޭ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއިން ވެސް އެ މައުލޫމާތު މީޑިއާތަކަށް ދިނުމުންނެވެ. ކުރީން މި ޚަބަރު ގެނެސްދިން ހުރިހައި މީޑިއާއަކުން ވެސް މިހާރު ވަނީ އެ ޚަބަރު ޑިލީޓްކޮށްލައިފައެވެ.
ހުޅުމާލޭ ކުރެދި ހިނގުމުން ސައިކަލެއްގައި ދުއްވައިފައި ދަނިކޮށް 29 އަހަރުގެ އީމާން ވެއްޓުނީ އިއްޔެ ހަވީރުގެ ވަގުތެއްގައެވެ. އެ މައުލޫމާތު ފުލުހުންނަށް ލިބުނީ އިއްޔެ ހަވީރު 16:25 ހައިއިރު ކަމަށް ފުލުހުން ވިދާޅުވިއެވެ.
އީމާން ސައިކަލުން ވެއްޓިފައި އޮތް މަންޒަރު ފެންނަ ވީޑިއޯއެއް މީސް މީޑިއާގައި ވަނީ އާންމުވެފައެވެ. އެ ވީޑިއޯން ފެންނަ ގޮތުގައި އެ ސަރަހައްދުގައި ގިނަ އަދަދަކަށް ލޭ އޮހޮރިފައި ހުއްޓެވެ.
