މާލޭ ސިޓީ ކައުންސިލްގެ ވެބްސައިޓުގެ އައު ފަރުމާ އިފްތިތާހުކޮށްފި
ޒަމާނީ ފެންވަރަށް ފަރުމާކުރެވިފައިވާ މާލެ ސިޓީ ކައުންސިލްގެ ރަސްމީ ވެބްސައިޓްގެ އައު ފަރުމާ އިފްތިތާޙްކޮށްފިއެވެ.
މިއަދު މި އިފްތިތާޙް ކުރެވިގެންދިޔަ ވެބްސައިޓް މެދުވެރިކޮށް ކައުންސިލުން ރައްޔިތުންނަށްދޭ މުހިންމު ޚިދުމަތްތަކުގެ ތަފްސީލީ މަޢުލޫމާތު ލިބިގެންދާނެ ކަމަށް ސިޓީ ކައުންސިލުން ބުނެއެވެ.
އޭގެ ތެރޭގައި ޚިދުމަތްތަކަށް އެދޭ ފޯމުތައް ފަސޭހައިން ޑައުންލޯޑު ކުރުމާއި، މާލެ ސިޓީ ކައުންސިލުން ކުރިއަށް ގެންދާ އިންވެސްޓްމެންޓްތަކާއި، ކައުންސިލްގެ ސްޓްރެޓެޖިކް އެކްޝަން ޕްލޭންގެ މަސައްކަތްތައް ކުރިއަށްދާ މިންވަރު ދެނެގަނެވޭނެއެވެ.
މީގެ އިތުރުން ވެސް މި ވެބްސައިޓް މެދުވެރިކޮށް މާލެ ސިޓީ ކައުންސިލުން ކުރިއަށް ގެންދާ އެންމެހައި މަޝްރޫޢުތަކުގެ ތަފްސީލީ މަޢުލޫމާތުތަކާ އެކު،ކައުންސިލްގެ ބައްދަލުވުންތަކާ ގުޅޭ މަޢުލޫމާތާއި، އެ ނޫން ވެސް މާލެ ސިޓީ ކައުންސިލުން ކުރިއަށްގެންދާ މަސައްކަތްތައް ރައްޔިތުންނަށް ފަސޭހަކަމާ އެކު ދެނެގަނެވެއެވެ.
މާލެ ސިޓީ ކައުންސިލް ވެބްސައިޓްގެ އައު ފަރުމާއަކީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ މާލެ ސިޓީ ކައުންސިލް ޑިޖިޓަލްކުރުމުގެ މަސައްކަތުގެ ތެރެއިން ވެބްސައިޓް މެދުވެރިކޮށް ގިނަ މަޢުލޫމާތު ފޯރުކޮށްދެވޭގޮތަށް ފަރުމާ ކުރެވިފައިވާ ވެބްސައިޓެކެވެ.
ޒަމާނީ ފެންވަރަށް މި ވެބްސައިޓް ފަރުމާ ކޮށްދެއްވައިފައި ވަނީ ރާއްޖޭގައި ފުޅާ ދާއިރާއެއްގައި މި މަސައްކަތްކުރާ އެކްސްކޯޕް ޕްރައިވެޓް ލިމިޓެޑުންނެވެ.
https://www.malecity.gov.mv/
އެކްސްކޯޕަކީ ރާއްޖޭގައި ޑިޖިޓަލައިޒް ކުރުމުގެ މަސައްކަތް ކުރަމުން އަންނަ ތަޖްރިބާކާރު ކުންފުންޏެކެވެ. އެގޮތުން އެކްސްކޯޕް ޕްރައިވެޓް ލިމިޓެޑުން ވަނީ ރާއްޖޭގައި ކަނޑު ދަތުރު ފަތުރުގެ ނިޒާމް ޑިޖިޓަލްކޮށް ސްޕީޑްބޯޓްތައް ފަސޭހަކަމާ އެކު މެނޭޖް ކުރެވޭނެ ޕްލެޓްފޯމެއް ކަމަށްވާ އޮޑިއެޕް ތަޢާރަފްކޮށްފައެވެ.
މާލެ ސިޓީ ކައުންސިލްގެ އުންމީދަކީ މިވެބްސައިޓަކީ ކައުންސިލާއި ރައްޔިތުންނާ އޮންނަ ގުޅުން އިތުރަށް ވަރުގަދަވެގެންދާނެ ވަސީލަތަކަށް ވެގެންދިއުމެވެ.
