އަޅުގަނޑުމެންނަށްވުރެ ވަކި އިހްލާސްތެރި ބަޔަކު ސަރުކާރަކަށް ނުލިބޭނެ: އީވާ
ރައީސް މުޙައްމަދު ނަޝީދުގެ ފެކްޝަނުގައި ހިމެނިވަޑައިގަންނަވާ އެމްޑީޕީގެ މެމްބަރުންނަށް ވުރެ، ވަކި އިހްލާސްތެރި ބަޔަކު، މި ސަރުކާރަށް ނުލިބޭނެ ކަަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެެއެވެ.
ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު ވަނީ، މަޖިލިސް ތެރެއިން ސަރުކާރު ވައްޓައިލާން މަސައްކަތް ކުރަމުން އަންނަ ކަމަށް ތުހުމަތު ކުރައްވައި، ރައީސް ނަޝީދުގެ ފެކްޝަނަށް ވަރަށް ބޮޑަށް ފާޑު ވިދާޅުވެފައެވެ.
ޝަރީފުގެ ވާހަކައާ ގުޅިގެން އީވާ ވިދާޅުވީ އޭނާއާއި، އެމްޑީޕީގެ ކުރީގެ ޗެއާޕާސަން ހަސަން ލަތީފާއި، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއާއި އުނގޫފާރު ދާއިރާގެ މެމްބަރު މުހައްމަދު ވަހީދު(ވައްޑެ)މެން ފަދަ ބޭފުޅުންނަކީ އިހްލާސްތެރިން ކަމަށާއި، އެވަރުގެ އިހްލާސްތެރިން ނުލިބޭނެ ކަމަށެވެ.
"އެމްޑީޕީއަށް މިއަށް ވުރެ، ދިވެހި ރައްޔިތުންނަށް ޓަކައި ވަކާލާތު ކުރުމުގައި މިއަށް ވުރެ އިހްލާސްތެރި މީހުންނެއް، އިއްޒަތްތެރި ރައީސް ނުލިބޭނެ." އީވާ ވިދާޅުވިއެވެ.
އީވާ ވިދާޅުވީ އެމްޑީޕީގެ ޗެއާޕާސަންގެ މަގާމަށް ވާދަކުރަައްވާ އިންތިމެން ފަދަ ބޭފުޅުން، ކުރީ ސަރުކާރުގެ ފަސް އަހަރުގެ ތެރޭގައި އެ ކުރެއްވި ހިތްވަރު ނުކުރެއްވި ނަމަ، ސަރުކާރެއް ނޯންނާނެ ކަަމަށެވެ.
"މި ލައިގެން މިއުޅޭ މެމްބަރުންނަކީ، އެމްޑީޕީ މެމްބަރުން. އަޅުގަނޑުމެން މިތާގައި އެމްޑީޕީ މީހުންނަށް ބޭއިންސާފުވެރިވާން ހެދީމާ، އަޅުގަނޑުމެން ވަކާލާތު ކުރާނަން. އިމްތިޔާޒު ފަހުމީމެން ނުކުމެވަޑައިގެން އެކުރި ހިތްވަރު ނުކުރި ނަމަ، މިއަދު ކޮން ސަރުކާރެއްތޯ، އިއްޒަތްތެރި ރައީސް، އޮންނާނީ؟" އޭނާ ވިދާޅުވިއެވެ.
މީގެ އިތުރުން އީވާ ވަނީ، އެމްޑީޕީއަށް ވަފާތެރި މީހުން ވަޒީފާއިން ވަކި ކުރާނަމަ، 2023ގެ ރިޔާސީ އިންތިޚާބު ކާމިޔާބު ނުވާނެ ކަމަށް ވެސް ވިދާޅުވެފައެވެ.
