ދުނިޔޭގެ ހަނދާނީ ބިނާތަކުގެ ލިސްޓަށް އައްޑޫ ކޯގަންނު ގަބުރުސްތާނު
ވޯލްޑް މޮނިއުމަންޓް ފަންޑުގެ ވޮޗް ލިސްޓުގައި އައްޑޫސިޓީ ކޯގަންނު ޤަބުރުސްތާނު ހިމެނިއްޖެއެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުގެ ހެރިޓޭޖް ސެކްޝަންގެ ހެޑް ޒަހާ އަޙްމަދު ވިދާޅުވީ، ކޯގަންނު ޤަބުރުސްތާނުން ފެންނަހުރި މަހާނަގައުތަކުގައި އެކި ކަހަލަ ކަނޑާނެގުންތަކާއި އެކި ޑިޒައިންނާއި ލިޔުންތައް ފެންނަން އެބަހުރި ކަމަށެވެ.
ޒަހާ ވިދާޅުވީ އެ މަހާނަ ގައުތަކުގެ ތެރޭގައި އާއްމުކޮށް ރާއްޖޭގެ ޤަބުރުސްތާނުތަކުން ފެންނަން ނެތް ބޮޑެތި މަހާނަ ގައުތައް ހިމެނޭކަމަށެވެ. އަދި އެ ރަށަކީ 7 އާއިލާއަކުން އާބާދުވި ރަށެއް ކަމަށް ވެސް ޒަހާ ވިދާޅުވިއެވެ.
ޒަހާ އިތުރަށް ވިދާޅުވީ ބައެއް މަހާނަ ގައުތައް ގާތްގަނޑަކަށް 7 ފޫޓު ބަޔަށް ވުރެ ވެސް އުސް ކަމަށެވެ. އަދި މަހާނަ ގައުތައް ހަދައިފައި ހުރީ އެއްގަލުން ބޮޑު އެއް ހިރިން ކަމަށާއި މި ކަމަކީ އާއްމުކޮށް ފެންނަ އާސާރީ ތަންތަނުން ފެންނަ މަންޒަރެއް ނޫން ކަމަށެވެ.
ކޯގަންނު ޤަބުރުސްތާނު ވޯލްޑް މޮނިއުމަންޓް ފަންޑުގެ ވޮޗް ލިސްޓުގައި ހިމަނައިފައިވާ އިރު، ޤަބުރުސްތާނާއި ޖެހިގެން އޮތް ބިމުގައި ހެރިޓޭޖް ކޮމްޕްލެކްސްއެއް ތަރައްޤީކުރުމުގެ މަސައްކަތް މިހާރު ވަނީ ފަށައިފައެވެ.
އެ ޕްރޮޖެކްޓުގެ ދަށުން އެ ތަނުގައި މިއުޒިއަމަކާއި، ޑިސްޕްލޭ ހޯލަކާއި، ބާރޑް ސެންޗުއަރީއަކާއި، ލައިބްރެރީއަކާއި އޮޑިޓޯރިއަމް މިފަދަ އެކިއެކި ޚިދުމަތްތައް ހިމެނޭ ކޮމްޕްލެކްސްއެއް ޤާއިމުކުރަން ވަނީ މަޝްވަރާކުރެވިފައެވެ.
Ads by STO
