އިންތިގެ ކެމްޕެއިނުގައި ކުރަމުންދާ މަސައްކަތަކީ ސީދާ މީހާއާ ބައްދަލު ކުރުން: ވައްޑެ
ވެރިކަން ކުރާ އެމްޑީޕީގެ ޗެއާޕާސަނަކަށް ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ ކެމްޕޭންގައި ކުރަމުންދާ މަސައްކަތަކީ ސީދާ މީހާއާ ބައްދަލު ކުރުންކަމަށް މި އިންތިހާބުގައި އިންތިގެ ތަރުޖަމާނުކަން ކުރައްވާ، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
އިންތިގެ ކެމްޕެއިން ޓީމުން މިއަދު ބޭއްވި ނޫސްވެރިންގެ ބައްދަލުވުމެއްގައި ވައްޑޭ ވިދާޅުުވީ އެ ޓީމުން މިރޭ އިންތިގެ ކެމްޕެއިނު ޖަގަހައެއް ވެސް ހުޅުވުމަށް ހަމަޖެހިފައިވާ ކަމަށެވެ.
ޖަގަހަ ހުޅުވުމުގެ ރަސްމިއްޔާތު އޮންނާނީ މިރޭ 8:45ގައި ހ. ފޭރުމާދޭގޭގައި ކަމަށާއި އިންތިގެ ސަޕޯޓަރުންނާއި ކެމްޕޭންގައި އަމަލީ ގޮތުން މަސައްކަތް ކުރުމަށް ބޭނުންވާ ހުރިހައި ބޭފުޅުންނަށް ޖަގަހަ ހުޅުވުމުގެ ރަސްމިއްޔާތަށް ދައުވަތުއަރުވާ ކަމަށް ވެސް ވައްޑެ ވިދާޅުވިއެވެ.
މީގެ އިތުރުން ވައްޑެ ވިދާޅުވީ، އިންތިއަށް ސަޕޯޓު ހޯދުމުގެ ގޮތުން މި މާޗް މަހުގެ 3އިން 6އަށް އައްޑޫ ސިޓީގައި ކެމްޕޭން ޓީމުގެ ފަރާތުން ދަތުރު ކުުރުމަށް ހަމަޖެހިފައިވާ ކަމުގައެވެ. އެ ދަތުރުގައި އައްޑޫ ސިޓީގެ ހުރިހާ ރަށެއްގައި ދޮރުން ދޮރަށް ހިނގުމާ އެކު އައްޑޫގެ ކެމްޕޭން ޓީމުތަކާއި ބައްދަލުކޮށް ކެމްޕޭން އޮނިގަނޑު އެކުލަވާލުން ހިމެނޭ ކަމުގައި ވެސް ވައްޑެ މައުލޫމާތު ދެއްވިއެވެ.
