ފައްޔާޒަށް ކުރެވޭ ތުހުމަތުތައް ދިފާއު ކުރެއްވުމުން ރައީސް ނަޝީދުގެ ހިތްހަމަނުޖެހުން މެނޭޖަރަށް
އެމްޑީޕީގެ އެތެރޭގެ އިންތިޚާބުގައި އެ ޕާޓީގެ ޗެއާޕަރސަން ކަމަށް ވާދަކުރައްވާ ފައްޔާޒް އިސްމާއީލަށް ކުރެވޭ ތުހުމަތުތައް ދިފާއުކުރައްވައި އޭނާގެ ކެމްޕޭން މެނޭޖަރު އިބްރާހީމް ވަހީދު (އިބްރޭ) ވާހަަކަދެއްކެވުމާ ގުޅިގެން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހިތްހަމަނުޖެހުން ފާޅުކުރައްވައިފިއެވެ.
ޗެއަރޕާސަންގެ މަގާމަށް ފައްޔާޒާ ވާދަކުރަނީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)އެވެ.
އެ ގޮތުން އިންތިއަށް ތާއީދުކުރާ ބައެއް ފަރާތްތަކުން ތުހުމަތުކޮށްފައި ވަނީ، ފައްޔާޒުގެ ބާރާއި ނުފޫޒު ބޭނުން ކުރައްވައިގެން ސަރުކާރުގައި މަސައްކަތް ކުރާ އަދި އިމްތިޔާޒަށް ތާއީދު ކުރާ ބައެއް މީހުން ވަޒީފާތަކުން ވަކިކޮށް ބައެއް މީހުންނަށް އެކި ކަހަލަ ފިޔަވަޅުތައް އަޅަމުންދާ ކަމަށާއި ފައްޔާޒު ގެންދަވަނީ ބައެއް މީހުންނަށް ފައިސާ ބައްސަވަމުން ކަމަށެވެ.
އެމްޑީޕީގެ ޤައުމީ މަޖިލިސް މެންބަރުން ތިއްބަވާ ގްރޫޕެއްގައި ރޭ އެ މައްސަލަ ހޫނުވުމުން، ފައްޔާޒްގެ މެނޭޖަރ އިބްރޭ ވަނީ އެ ތުހުމަތުތަކުން ފައްޔާޒު ދިފާޢު ކުރައްވައިފައެވެ.
އިބްރޭ ވިދާޅުވީ، އެއްވެސް މުވައްޒަފަކަށް ފައްޔާޒު ބިރު ދައްކަވައިފައި ނުވާ ކަމަށާއި އަދި އެމްޑީޕީގެ މެންބަރުންނަކީ މީހަކު ދައްކާ ބިރަކަށް އެމީހުންގެ ވިސްނުން ބަދަލުކުރާ ކަހަލަ ބައެއް ނޫން ކަމަށެވެ.
އިބްރޭގެ ވާހަކަތަކަށް ރައްދު ދެއްވަމުން ރައީސް ނަޝީދު ވިދާޅުވީ "މީހެއްގެ ވިއްޔާ ގޮތެއް ވެސް ހުންނަން ވާނެ"ކަމަށެވެ. އަދި އެމަނިކުފާނާއި އެމަނިކުފާނުގެ ޓީމު "އެބަތިބިކަން ބަލާ ނުލަނީބާ"އޭ ވެސް އެއްސެވި އެވެ. އަދި އެމަނިކުފާނު ވެސް ހިތު ހުރިހައި އެއްޗެއް ގޮވަމުން ނިކުންނަންވީތޯ" ވެސް ސުވާލު ކުރައްވައިފައި ވެއެވެ.
