"އައްޑޫއިން މިފުރީ، ހިތް ފުރިގެން ތިބެ"
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު، އަދި އެމްޑީޕީގެ ޗެއާޕާސަންގެ މަގާމަށް ވާދަ ކުރައްވާ އިމްތިޔާޒު ފަހުމީ އައްޑޫ ސިޓީއަށް ކުރެއްވި ކެމްޕެއިން ދަތުރު ނިންމަވައިލެއްވުމަށް ފަހު ފުރީ، "ހިތްފުރިގެން ތިބެ" ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެއެވެ.
އަންނަ އޭޕްރީލްމަހުގެ 16 ވަނަ ދުވަހު ބާއްވާ އެމްޑީޕީގެ ޗެއާޕާސަންގެ އިންތިހާބުގައި އިންތިއާ ވާދަ ކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލެވެ.
މި އިންތިހާބުގެ ކެމްޕެއިން ހަރަކާތްތައް، ދެ ކެންޑިޑޭޓުން ވެސް ވަރަށް ފޯރީގައި ކުރިއަށް ގެންދަވަމުން އަންނަ އިރު، އީވާ ތާއީދު ކުރައްވަނީ އިންތިއަށެވެ.
އެގޮތުން އިންތިގެ އަައްޑޫ ދަތުރުގައި ވެސް އީވާ ވަނީ ބައިވެރިވެވަޑައިގެންފައެވެ.
އީވާ ވިދާޅުވި ގޮތުގައި، އައްޑޫ ސިޓީއަށް ކުރި ދަތުރުން، އިންތިއާ މެދު އައްޑޫގެ ރައްޔިތުންގެ ހިތްތަކުގައިވާ ލޯތްބާއި، ޝައްކެއް ނެތް އިތުބާރު ވަނީ ފެނިގެން ގޮސްފައެވެ.
"އައްޑޫއިން މިފުރީ ހިތް ފުރިގެން ތިބެ، ޝުކުރިއްޔާ އައްޑޫ ރައްޔިތުން." އީވާ ވިދާޅުވިއެވެ.
އިންތިއަށް އައްޑޫއަށް ކުރެއްވި ދަތުރުގައި ކެމްޕެއިން ހަރަކާތްތައް ކުރިއަށް ގެންދެވީ ގޭގެއަށް ވަޑައިގެންނެވެ.
މި ދަތުރުގައި އެމްޑީޕީގެ ކުރީގެ ޗެއާޕާސަން ހަސަން ލަތީފު ވެސް ބައިވެރިވެވަޑައިގެންނެވިއެވެ.
