އެމްޑީޕީގެ މެންބަރުންގެ އަޑު އިއްވުމަށް އިންތިގެ ޓީމުން ހަރަކާތެއް ހިންގަނީ
ސަރުކާރު ކޯލިޝަންގެ މައި ޕާޓީ، މޯލްޑިވްސް ޑިމޮކްރެޓިކް ޕާޓީ، އެމްޑީޕީގެ އާއްމު މެންބަރުންގެ ކަންބޮޑުވުންތައް ސަރުކާރުގެ ވެރިންނަށް އަޑު އިއްވުމަށް ޓަކައި "މިނިވަން ބަހުސް"ގެ ނަމުގައި ބަހުސެއް ފެށުމަށް އެ ޕާޓީގެ ޗެއަރޕާސަންގެ މަޤާމަށް ވާދަ ކުރައްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)ގެ ޓީމުން ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އިންތިގެ ކެންޕެއިން ޓީމުގެ ތަރުޖަމާނު އުނގޫފާރު ދާއިރާގެ މެންބަރު، މުހައްމަދު ވަހީދު (ވައްޑެ) ވިދާޅުވީ، މި އިންތިޚާބާ ގުޅުވައިގެން ސިލްސިލާކޮށް، މި ބަހުސް ބާއްވަން ނިންމައިފައިވާ ކަމަށެވެ. އަދި މިހަރަކާތުގެ ބޭނުމަކީ ރައްޔިތުންގެ އަޑު ވެރިންނާ ހަމައަށް ދާނެ މަގެއް ހޯދުން ކަމަށް އޭނާ ވިދާޅުވިއެވެ.
މިނިވަން ބަހުސްއަކީ 2004ވަނަ އަހަރު ފެށި ހަރަކާތެކެވެ. މި ހަރަކާތް ވެގެން ދިޔައީ، ރާއްޖެއަށް މަލްޓި ޕާޓީ ސިސްޓަމެއް ތައާރަފް ކުރުމަށް ވެގެން ދިޔަ ބާރަކަށެވެ.
ވައްޑެ ވަނީ މިއަދުގެ ނޫސްވެރިންގެ ބައްދަލުވުމުގައި، އައްޑުއަށް އިމްތިޔާޒުގެ ކެމްޕޭން ޓީމުން ކުރި ދަތުރު ވަރަށް ކާމިޔާބު ކަމަށާއި އެ ދަތުރުން އިތުރަށް ހިތްވަރު އައު ވެގެން ދިޔަ ކަމަށް ވިދާޅުވެފައެވެ އަދި އަންނަ ހަފްތާ ބަންދުގައި، ހއ. އަދި ހދ. އަތޮޅަށް ދަތުރު ކުރަން ނިންމަވައިފައިވާ ކަމަށް ވެސް އޭނާ ވިދާޅުވިއެވެ.
ޗެއަރޕާސަންގެ އިންތިޚާބު ރޯދަ މަހާ ދިމާވާތީ ފަސް ކުރަން، އިންތިޚާބުގައި އިންތިއާ ވާދަ ކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލް ވަނީ އެދިވަޑައިގެންފައެވެ. މިކަމާ ގުޅޭ ގޮތުން ވައްޑެ ވިދާޅުވީ، އިންތިޚާބުގެ ތާރީޚް ބަދަލު ކުރަން އުޅުމަކީ ކަންބޮޑުވާ ކަމެއް ކަމަށެވެ. އަދި އެއީ އިންތިޚާބަށް ނުފޫޒު ފޯރުވަން ކުރާ ކަމެއްގެ ގޮތުގައި ތުހުމަތު ކުރެއްވިއެވެ.
ފިންކް ގޮނޑީގައި ތި ތިބީ