ރައްޔިތުންނަށް ވައުދު ވަނީ ސަރުކާރަކުން ނޫން، ސިޔާސީ ޕާޓީތަކުން: ހަސަންޓޭ
ރައްޔިތުންނަށް ވައުދު ވަނީ ސަރުކާރަކުން ނޫން ކަމަށާއި، އެ އިރެއްގައި ބާއްވާ ރިޔާސީ އިންތިޚާބަކަށް ނުކުންނަ ސިޔާސީ ޕާޓީތަކުން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ހަސަން މުހައްމަދު (ހަސަންޓޭ) ވިދާޅުވެއްޖެއެވެ.
އޭނާ މިހެން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ސިވިލް ސަރވިސްގެ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ.
އޭނާ ވިދާޅުވީ ސިޔާސީ ޕާޓީއަކުން އިންތިހާބެއްގައި ވާދަކުރާއިރު، ރައްޔިތުންނަށް ކޮށްދޭން ބޭނުންވާ ކަންކަން، މެނިފެސްޓޯއެއްގެ ސިފައިގައި ފޮތެއްގައި ލިޔާ ކަމަށެވެ.
"އެ ވައުދުތައް ފޮތެއްގައި ލިޔެ، އޭގެ މައްޗަށް ރައްޔިތުން ވޯޓު ދެވި، އޭގެ މައްޗަށް ސަރުކާރެއް، ރައްޔިތުން ހަވާލު ކުރީމާ، ހިނގަން ޖެހޭނީ އެ ސިޔާސީ ޕާޓީއަކުން ރައްޔިތުންނަށް ވެފައިވާ ވައުދު." އޭނާ ވިދާޅުވިއެވެ.
ހަސަންޓޭ އިތުރަށް ވިދާޅުވީ، އެމްޑީޕީގެ މެމްބަރުން، އެޕާޓީ ދެކެ ކިތަންމެ ލޯބި ވިޔަސް، ތާ އަބަދަށް ސަރުކާރުގައި ދެމި ތިބެވިދާނެ ކަމަށް ދެކިގެން ނުވާނެ ކަމަށެވެ. އަދި މިއަދު ގައުމުގެ އިސް މަގާމުތަކުގައި ތިބި ފަރާތްތަކުގެ އަމަލުތަކަށް، އަންނަން އޮތް ޖީލުތައް ފާރަވެރިވާނެ ކަމަށް ވެސް އޭނާ ވިދާޅުވިއެވެ.
