119 ކިލޯގެ ޑްރަގް މައްސަލަ: ތިން މީހުން ޝަރީއަތް ނިމެންދެން ބަންދަށް
ރާއްޖެއިން އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ދައުވާ އުފުލައިފައިވާ ތިން މީހަކު ޝަރީއަތް ނިމެންދެން ބަންދުކޮށްފިއެވެ.
މިދިޔަ އަހަރުގެ ޑިސެމްބަރު މަހުގެ 12ވަނަ ދުވަހު މާލޭގައި ހިންގި އޮޕަރޭޝަނެއްގައި ޓެކްސީއެއް ހުއްޓުވައި ބަލައިފާސްކުރިއިރު މަސްތުވާތަކެތި ހުރި 28 ރަބަރު ޕެކެޓު ހޯދައިފައިވެއެވެ. މީގެ އިތުރަށް އިތުރު ކާރަކާއި، ސައިކަލަކުން ވެސް މަސްތުވާތަކެތި އަތުލައިގަތް އިރު ޖުމްލަ 119 ކިލޯގެ މަސްތުވާތަކެތި މި މައްސަލައިގައި ހޯދައިފައިވެއެވެ.
މި މައްސަލަ ތަހުގީގު ކުރި އިރު، އެ ޓެކްސީއިން ފެނިފައިވާ ތަކެއްޗަކީ ޑިސެމްބަރު މަހުގެ 12ވަނަ ދުވަހުގެ ފަތިހުގެ ވަގުތެއްގައި “ބަންގާ” ނަމަކަށްކިޔާ ލޯންޗުން މާލެއަށް އެތެރެކުރި ތަކެތިކަން ފުލުހުންނަށް އެނގިފައިވާކަމަށް ފުލުހުން ވިދާޅުވިއެވެ. އަދި އެ ތަކެތި އެތެރެކުރުމުގައި ހަރަކާތްތެރިވީ ހައްޔަރުކުރި ގދ. ހޯނޑެއްދޫ ގުލޭނޫރަންމާގޭ އަލީ ޒުބައިރުގެ އިތުރުން ގދ. ހޯނޑެއްދޫ/ ދޯދި މުހައްމަދު އަކްރަމް އަބްދުލް ހަންނާން (31)އާއި ހަމަ އެރަށު އަލޯރާ އަހުމަދު މުޖާހިދު (29)ކަމަށް ވެސް ފުލުހުން ވިދާޅުވިއެވެ. މި މައްސަލަައިގައި ދައުވާ ކޮށްފައި ވަނީ ވެސް މި ތިން މީހުންގެ މައްޗަށެވެ.
ދައުލަތުން ބުނި ގޮތުގައި އެ ކާރަކީ އެމީހުންނާ ގުޅުން ހުރި ކާރެއްކަން އެމީހުން ދޮގުކުރި ނަމަވެސް އެކަން ސާބިތުވާ ލިޔެކިޔުމާއި، މަސްތުވާތަކެތި ބަންދުކުރުމަށް ބޭނުންވާ ތަކެތި ގަންނަ ވީޑިއޯ ވެސް ހެކީގެ ގޮތުގައި ލިބިފައިވެއެވެ.
