އައިޖީއެމްއެޗުން މިއަދު ގުލަކޯމާއަށް ސްކްރީން ކުރެވޭނެ
ދުނިޔޭގެ ގުލަކޯމާ ދުވަހާ ގުޅިގެން، މި ބައްޔަށް ސްކްރީން ކުރުމުގެ ފުރުސަތު އިންދިރާ ގާނދީ މެމޯރިއަލް ހޮސްޕިޓަލުން ހުޅުވައިލައިފިއެވެ.
އައިޖީއެމްއެޗުގެ ރަސްމީ ޓްވިޓަރ އެކައުންޓުން ކުރި ޓްވީޓެއްގައި ބުނީ، މި ބައްޔަށް ޓެސްޓު ކުރުން ކުރިއަށް ދާނީ މިއަދު މެންދުރު 2 ޖަހަންދެން ދަރުމަވަންތަ ހޮސްޕިޓަލްގެ 6 ވަނަ ފަންގިފިލާގައި ކަމަށެވެ.
ޑރ.އަބްދުލްއަޒީޒު ހަމީދު އޭނާގެ ބްލޮގުގައި ލިޔުއްވައިފައިވާ ގޮތުގައި ގުލަކޯމާއަކީ ވަރަށް އާންމު ލޮލުގެ ބައްޔެކެވެ. އެ ގޮތުން ސިކުނޑިއާ ލޯ ގުޅުވައިދޭ ލޮލުގެ މައިނާރު ހަލާކުވާ މި ބަލި ދުރާލާ ދެނެގަނެ ފަރުވާނުކުރެވިއްޖެ ނަމަ ލޮލުގެ ފެނުން ގެއްލިގެން ހިނގައިދާނެކަމަށް ޑޮކްޓަރު ވިދާޅުވެފައި ވެއެވެ.
ކޮންމެ އުމުރެއްގެ މީހަކަށް ވެސް ގުލަކޯމާ ޖެހިދާނެއެވެ. ނަމަވެސް އެންމެ އާންމުކޮށް ގުލަކޯމާ ކުރިމަތި ވަނީ އުމުރުން ދުވަސްވީ މީހުންނަށެވެ. އުމުރުން 60 އަހަރުން މަތީގެ މީހުންނަށް ލޯއަނދިރިވުން ކުރިމަތިކުރުވާ މައިގަނޑު ސަބަބަކީ ގުލަކޯމާކަން ފާހަގަ ކުރެވެއެވެ.
